Aýdaryspaqtan 3 qazaqstandyq sportshy altyn medal aldy

<p>ASTANA. KAZINFORM &ndash; 5-shi Dúnıejúzilik kóshpendiler oıyndarynda aqtyq synǵa joldama alǵan úsh qazaqstandyq sportshy da óz salmaqtarynda altyn júlde jeńip aldy. Olar &ndash; Ermek Quralbaı, Almat Látipbek jáne Daryn Ótkelbaı.</p>

Aýdaryspaq oıyndaryna 9 elden 64 oıynshy qatysty. Onyń qatarynda Qazaqstan, Qyrǵyzstan, Ózbekstan, Mońǵolııa, Reseı, Qytaı, AQSh, Túrkııa jáne Majarstan bar.

Foto: Aǵybaı Aıapbergenov/Kazinform

60 keli salmaqta synǵa túsken Qazaqstan ulttyq quramasynyń sportshysy Ermek Quralbaı altyn medalǵa ıe boldy. Ol fınalda Qyrǵyzstan sportshysyn jeńdi.

«Jaqsy daıyndyqpen keldim. Fınaldaǵy qarsylasym – byltyr at ústindegi kúresten 60 kelide chempıon bolǵan qyrǵyz palýany. El namysyn qorǵap, birinshi oryn alamyz dep úmittengen edim. Senimdi aqtaǵanyma qýanyshtymyn», – dedi Ermek Quralbaı.

Aýdaryspaqtan 70 keli salmaqta synǵa túsken Almat Látipbek te altyn medal jeńip aldy. 

Foto: Aǵybaı Aıapbergenov/Kazinform

Sondaı-aq, aýdaryspaqtan 80 keli salmaqta synǵa túsken Daryn Ótkelbaı altyn medalǵa ıe boldy.

Aıta keteıik, erteń 10 qyrkúıekte Esimhan Rahmatillá, Syrym Іzbasarov jáne Birjan Qosalıev synǵa túsedi.