Aýdaryspaq: Qazaqstandyq bapkerdiń jónsiz áreketi altynnan aıyrdy

<p>ASTANA. KAZINFORM &ndash; Aýdaryspaqtan 90 keli salmaqta el namysyn qorǵaǵan Esimhan Rahmatillá fınalda Qyrǵyzstan sportshysy Islam Berdibekýýlymen kezdeskeni belgili.</p>

Básekeniń negizgi bóligi teń aıaqtalyp, jeńimpazdy anyqtaý úshin qosymsha ýaqyt berilgen bolatyn. Erejege sáıkes, sportshylar bir-biriniń belbeýinen myqtap ustap aldy. Kimniń qoly belbeýden ajyrasa sol jeńilis tabady.

Osylaısha, bir-birin alma-kezek tartqylaǵan sportshylar biraz ýaqyt tartysty. Bir sátte Qazaqstan quramasynyń bapkeri «qarsylastyń qoly shyǵyp ketti» dep aıǵaı salmasy bar ma?!

Sóıtip, bas tóreshi toqtatpaǵan kezdesýdi bas bapkerdiń áreketi toqtatty. Eki tarap daýlasyp, aqyry beınejazbanyń kómegine júgindi.

Uzaqqa sozylǵan anyqtaý protsesi qazaq bapkeriniń áreketi negizsiz ekenin dáleldedi. Esimhan Rahmatillá jeńilmese de, altynnan aıyryldy.