Aýdandyq onkologtardyń eńbekaqysy artady - Dılıara Qaıdarova
QR Densaýlyq saqtaý mınıstrliginiń bas onkolog-dárigeri, qazaq ulttyq onkologııa jáne radıologııa ınstıtýtynyń dırektory Dılıara Qaıdarovanyń aıtýynsha, maýsym aıynda óńirlerdi damytý boıynsha keshendi jospar ázirlengen.
«Bul jospardy Úkimet bekitti. Astana men Almaty ǵana emes, ár óńirde 2022 jylǵa deıin jańa sáýlelik údetkishter ornatylady. Immýnogıstohımııa men telemedıtsına zerthanalary ashylady, munyń barlyǵy bıýdjette qarastyrylǵan. Terapııa boıynsha dári-dármekpen qamtamasyz etý 4 mlrd teńgeden astam somaǵa kóbeıedi. Aýdandyq onkologtardyń eńbekaqysyn kóterý úshin qarjylandyrý artady. Olardy yntalandyrý úshin qosymsha qarajat bólýdi suradyq. Árbir erte anyqtalǵan birinshi satydaǵy dıagnoz úshin qosymsha aqy tólenedi», - dedi Dılıara Qaıdarova Astanada Onkologııa jáne pallıatıvti kómektiń ózekti máselelerine arnalǵan halyqaralyq ǵylymı-tájirıbelik konferentsııada.
Sonymen birge, D. Qaıdarova naýqastarǵa durys dıagnoz qoıý úshin kóp ýaqyt jumsalatynyn jasyrmady.
«Bizdiń onkologtar jergilikti mekemede ádistemelik kómek kórsetýi qajet. Kelip túsken shaǵymdardy qarasaq, naýqastar qaterlik isikke deıin qate dıagnozdarmen sandalyp júrgenderin aıtady. Keıde qaterli isik dıagnozyn qoıý úshin bir aıdan astam ýaqyt ketedi», - deıdi bas onkolog-dáriger.
Aıta keteıik, Memleket basshysy óziniń halyqqa arnaǵan Joldaýynda aýrýlardy emdeý isin basqarýdyń jańa tásilderin engizgen ýchaskelik medıtsına qyzmetkerleriniń jalaqysyn kezeń-kezeńimen 20 paıyzǵa kóbeıtýdi tapsyrǵan edi.