Aýdandyq, qalalyq bilim basqarmalarynyń basshylary jańa tártippen taǵaıyndalady - BǴM

NUR-SULTAN. QazAqparat - Elimizde aýdandyq jáne qalalyq bilim bólimderi oblystyq bilim basqarmasynyń quzyryna beriledi, dep habarlaıdy QazAqparat tilshisi.

Bul týraly QR Bilim jəne ǵylym vıtse-mınıstri Bıbigúl Asylova aıtty.

2019 jylǵy 27 jeltoqsanda Memleket basshysy «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń ákimshilik-aýmaqtyq qurylysy, memlekettik basqarý júıesin, bıýdjetaralyq qatynastardy jetildirý, kredıtteý jáne bilim berý máseleleri boıynsha ózgerister men tolyqtyrýlar engizý týraly» QR Zańyna qol qoıǵan edi.

«Jańa zań arqyly Bilim jáne ǵylym mınıstrligi bilim berý uıymdaryn qarjylandyrýdy aýdandyq deńgeıden oblystyq deńgeıge aýystyrýdy kózdep otyr. Odan bilim berý júıesinde ne ózgeredi? Bilim berý uıymdaryn qarjylandyrý óńirlerdegi oblystyq bıýdjetten tikeleı bólinedi. Al aýdandyq, qalalyq bilim bólimderin derbes zańdy tulǵa retinde qarjylandyrý jalǵasady. Biraq, barlyq bıýdjettik qarajatty retteý jumystary ortalyqtandyrylyp, oblystyq bıýdjetten júzege asady», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, qarjylandyrýdyń dál osy formasy bilim berý uıymdaryn qarjylandyrý deńgeıin kóteredi.

«Qazir barlyq deńgeıde - mektepke deıingi, orta, tehnıkalyq jáne kásiptik, joǵarǵy bilim berýde jan basyna shaqqandaǵy normatıvti qarjylandyrý júrip jatyr. Bul bilim berý uıymdaryndaǵy qarjylandyrý protsesin ońtaılandyrady jáne bilim berý sapasyn jaqsartady. Odan bólek, aýdandyq bilim berý basqarmalarynyń basshylaryn taǵaıyndaý júıesi ózgeredi», - dedi B. Asylova.

2020 jyldyń 1 qańtarynan bastap, aýdandyq jáne qalalyq bilim berý basqarmalarynyń basshylaryn taǵaıyndaý oblystyq basqarmamen kelisiledi. Sáıkesinshe, jumystan shyǵý tártibi de oblystyq bilim basqarmalarynyń maquldaýyn qajet etedi.

Al oblystyq bilim berý basqarmalaryndaǵy taǵaıyndaý men jumystan shyǵarýdy QR Bilim jáne ǵylym mınıstrligi rettemek.