Aýdanda kókónis saqtaıtyn qoıma bolmaǵandyqtan, jetisýlyq fermer pııaz egýden bas tartqan

TALDYQORǴAN. QazAqparat – Jetisý oblysy Balpyq aýyldyq okrýgine qarasty Umtyl aýylyndaǵy sharýa qojalyǵynyń basshysy Ánýar Qadyrov aýdan ortalyǵynda kókónis saqtaıtyn qoıma bolmaǵandyqtan, pııaz ósirýden bas tartqan. Onyń ornyna qaýyn-qarbyz ekti, dep habaralaıdy QazAqparat tilshisi óńirlik kásipkerler palatasynyń baspasóz qyzmetine silteme jasap.

«Qadyrov» sharýa qojalyǵy sý resýrstaryn tıimdi paıdalaný jolynda aýdanda alǵash bolyp egistikti dástúrli túrde sýǵarýdan bas tartyp, Batys Eýropa elderi engizgen jańa tásildiń biri – tamshylatyp sýarý tehnologııasyn alyp kelgen.

Ótken jyly «Gerkýles», «Gelendjık» surpyndaǵy pııaz ósirýmen aınalysyp, jaqsy ónim alǵan kásipker bıyl bul isten bas tartqan. Buǵan kókónis saqtaıtyn qoımanyń bolmaýy sebep. Ornyna baqsha daqyldarynyń biri – qaýyn-qarbyz sepken. Osylaısha, fermer egis dalasyn bos qaldyrmaýdyń amalyn tabady.

Óńirlik kásipkerler palatasy Qaratal aýdandyq fılıalynyń dırektory Farhat Qusaıynov sharýa qojalyǵyna arnaıy baryp, kásip ıesi aıtqan usynystardy tyńdap qaıtty. Ánýar Qadyrov oǵan sharýalardyń mańdaı termen tapqan ónimderin qysta saqtaıtyn kókónis qoımasyn salý qajettigin aıtty.