«Aýdanda áleýmettik nan baǵasy - 40 teńge» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 17 aqpan, sárcenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

«Egemen Qazaqstan» gazetiniń jazýynsha, taıaýda Aqmola oblysynyń ákimi Sergeı Kýlagın óziniń San­dyqtaý aýdanyna barǵan jumys sapary barysynda Balqashın aýylyndaǵy naýbaıhananyń ju­mysymen tanysty.

Atalmysh kásiporyn basshysy Taıta Dokaevanyń aıtýynsha, naýbaıhanadaǵy áleýmettik nan baǵasy 40 teńgeni, al 620 gramdyq birinshi surypty bólke nannyń quny 52 teńgeni quraıdy.

Atap ótý kerek, 2015 jyly óndiris oshaǵy jeke qarajatqa kúrdeli jóndeýden ótkizilip, 40,0 mln. teńgege sheteldik nan pisirý qondyrǵysyn satyp alǵan. Sóı­tip búginde joba óziniń tolyq qýattylyǵyna enip, táýligine 3500 dana nan jáne nan ónimderin óndiredi. Bul jerde nannyń 20-ǵa jýyq túri men tátti torttar, bálishter de pisirý qolǵa alynǵan. Ótken jyly seriktestik 30 mln. teńgeniń 936 myń bólke nany men 340 myń kondıterlik ónim óndirgen. Kásiporyn basshysynyń aıtýynsha, búginde nandy qolmen pisirý tájirıbesi joqtyń qasy, barly­ǵyn tehnıka jasaıdy, ıaǵnı nandy ıleıdi, bóledi, nan peshine salady. Daıyn ónim Sandyqtaý jáne Zerendi aýdandarynda satylady.

«Áleýmettik nan baǵasynyń qunyn qymbattatý josparymyzda joq. Sondyqtan jyl aıaǵyna deıin áleýmettik nan quny 40 teńge bolyp qalady», dedi oblys áki­mine naý­baıhana basshysy Taıta Dokaeva. Bul materıal «Aýdanda áleýmettik nan baǵasy - 40 teńge» degen taqyryppen berilgen.

Bas basylymda Qazaqstan Respýblıkasynyń Syrtqy ister mınıstri Erlan Ydyrysovpen bolǵan suhbat kópshilik nazaryna usynylyp otyr.

«Sirá, álemde qalyptasqan eko­­nomıkalyq jaǵdaı, eń aldymen «ekonomıkalyq dıplomatııa» quraldaryn keńeıtýdi jáne amal-tásilderdi jańartýdy talap etedi. Búgingi kúni ındýstrııalyq-ın­no­v­atsııalyq jobalar, «Nur­ly Jol» baǵdarlamasy men «Qa­zaq­stan-2050» Strategııasy sheń­berinde shetel ınvestıtsııalaryn tartý jáne otandyq eksportty shetel naryǵyna ilgeriletý syrtqy saıasat vedomstvosy jumysynyń negizgi baǵyttary bolyp tabylady.

Osyǵan oraı, alqa májilisiniń negizgi taqyryby «Qazaqstan Res­pýblıkasynyń syrtqy saıasatyn ekonomıkalandyrý» boldy. Al «ekonomıkalyq dıplomatııany» nyǵaıtý men ony kúsheıtý aıasynda Memleket basshysy jarııa etken áleýmettik-ekonomıkalyq damý jáne memleketti jańǵyrtý jó­nindegi jobalar biz úshin basty mindetter bolyp tabylady. Búgin shetelderdegi mekemelerimizge sol memleketterdiń ekono­mı­ka­lyq, ınvestıtsııalyq jáne tehno­lo­gııalyq áleýetine súıene otyryp, Qa­zaqstanǵa tıimdilik ákeletin tur­ǵyda naqty tapsyrmalar berilip, qyzmetine ózgerister engizilýde»,-deıdi mınıstr. Bul suhbat gazettiń búgingi sanynda «Elbasy belgilegen jańa talaptar» degen taqaryppen jarııalandy.

***

«Aıqyn» gazetiniń jazýynsha, ótkende elimizdegi Ulttyq parkter men qoryqtar satylady degen aqparat taraldy. Memleket satýǵa qoıǵan kompanııalar qatarynda týrıstik-tabıǵı nysandardyń da bary aıtyldy.

Sol-aq eken, qoǵamda úlken dúmpý týyp, tabıǵat janashyrlary buǵan narazylyq bildirdi. Uzamaı Memlekettik múlik jáne jekeshelendirý komıteti tóraǵasynyń orynbasary Ǵalymjan Ibraıymov ulttyq parkter men qoryqtardyń saýdaǵa salynbaıtynyn habarlady.

- Mundaı aqparattyń qaıdan shyq­qanyn bilmeımin. Bárińizdi de sabala­ryńyzǵa túsireıin. Ulttyq parkter men qoryqtar - árdaıym memlekettiń men­shiginde bolatyn nysandar. Mundaı nysandardy memlekettiń múlki qatarynan aıyrýǵa bolmaıdy jáne bul Prezıdenttiń qaýlysymen bekitilgen. Sondyqtan bizdiń ulttyq parkterimiz ben qoryqtarymyz satylmaıdy. Olar memleket­tiń menshigi bolyp qala beredi. Sebebi olar bizdiń memlekettik ıgiligimiz, - dedi.
Shynynda, qoryqtar jekeniń qolyna satylsa, ań-qusy atylyp, ormany otalyp, baı tabıǵaty talan-tarajǵa túspesine kim kepil? Alaıda parkter men qoryqtar jalǵa beriletin boldy. Muny qalaı túsinýge bolady? Ǵalymjan Ibraıymov buǵan qatysty da túsinikteme berdi.

- Ulttyq parkterdiń alyp otyrǵan aýmaǵy úlken. Sondyqtan ulttyq park aýmaǵyndaǵy belgili bir ınfraqurylymdy nysandar, jol, turǵyn úıler, shıpajaılar jalǵa beriletin bolar. Al ulttyq parktiń ózi tutasymen eshqashan jalǵa berilmeıdi, - dedi.
Qazirge deıin jalǵa beriletin elý shaqty tabıǵı nysannyń tizimi shyqty. Olardyń qa­tarynda taý, shatqal, orman, tipti ańyzaq dala men ózen-kólder de bar. Almaty oblysyndaǵy Kólsaı kólderi, Sharyn shatqaly, Túrgen jáne Talǵar shatqaldary, tipti Medeý kesheni de jalǵa berilmek. Sondaı-aq jalǵa beriletin tender tiziminde shyǵystaǵy Qaton-Qaraǵaı ulttyq parki, ońtústiktegi Syrdarııa-Túrkis­tan mem­lekettik óńirlik tabıǵı saıabaǵy, soltústiktegi Býrabaı ulttyq parki de bar. Bul nysandardy osy aqpan aıynan bastap 49 jylǵa deıin jalǵa alýǵa ruqsat berilgen.
Bulardy jalǵa alǵan adamdarǵa da tıisti talap qoıyldy. Investor ulttyq parkter aýmaǵynda barlyq qajetti ınfraqurylym­dardy turǵyzyp, týrıstik bıznesti damytý qajet. Sondaı-aq taza aýada tynystaǵysy keletin jandardyń demalýyna qajetti barlyq jaǵdaıdy jasaýǵa mindetti. Osy baǵytta Aýylsharýashylyq mınıstrligi mamandary ulttyq park basshylyǵyna parkterdi jalǵa alǵysy keletin ınvestor­larmen tıimdi jumys júrgizýdi usyndy.
Orman sharýashylyǵy jáne janýarlar dúnıesi komıteti tóraǵasynyń mindetin atqarýshy Qaırat Óstemirov ulttyq parkterge ınvestorlardy tartý jumysy bastalǵanyn habarlady. Bul týraly «Jalǵa berse jaǵdaı jaqsara ma?» degen maqaladan tolyq oqı alasyzdar.

Osy basylymda «Tarazda jastar teatry ashyldy» atty maqala jarııalandy. Onyń akterleri - osy oqý ornynyń stýdentteri. Teatr ónerpazdary Israıl Saparbaıdyń «Syǵan serenadasy» mýzykalyq dramasyn sahnalady. Bul - teatr repertýaryndaǵy alǵashqy klassıkalyq shyǵarma.
Áıgili Shámshiniń júrek shymyrlatar, sezim serpilter qudiretti ánderi árbir qazaqtyń aýzynda. Sol sulý ánder ómirge qalaı keldi? Jalpy, Shámshiniń óz taǵdyry, óz mahabbaty týraly ne bilesiz? Eriksiz bıge jetelep mahabbatpen tebirenter «Syǵan serenadasy». Osy bir ándi oıatqan syǵan qyzy Izolda jaıly estigenińiz bar ma? Án mahabbaty Shámshi taǵdyryn toqaılastyrǵan Israıl Saparbaıdyń «Syǵan sere­nadasy» atty poetıkalyq dramasy sahnada osy turǵyda syr shertisedi. Áýenge toly drama áserge de toly. «Syǵan serenada­sy» - teatr sahnasyndaǵy shoqtyǵy bıik týyndylardyń biri. Onyń óresi keń, qupııasy ashylmaǵan. Vals koroli áıgili Shámshi rýhyna baǵyshtalǵan bul týyndy sazgerdiń taǵdyryn beıneleıdi.
Teatr rejısseri, Qazaqstan Respýblıkasynyń eńbek sińirgen artısi Maıra Álimbetovanyń aıtýynsha, bolashaqta mahabbat pen dostyqtyń qanshalyqty qudiretti kúsh, uly sezim ekenin uǵyndyratyn hám jurtshylyqtyń kóńil tórinen oryn alǵan klassı­kalyq qoıylymdar sahnalanbaq.

***

«Kazahstanskaıa pravda» gazetinde «Belgııý jdýt na EKSPO-2017» atty maqala berilgen. QR Syrtqy ister mınıstriniń birinshi orynbasary R.Joshybaev basqarǵan qazaqstandyq delegatsııa Belgııa Koroldiginde jumys saparymen boldy. R.Joshybaev EKSPO-2017 kórmesine daıyndyq jaıly aıtyp, belgııalyq bıznesmenderdi halyqaralyq kórmege qatysýǵa shaqyrdy.
EKSPO-2017 komıssarynyń sózine qaraǵanda, eldiń iri «CMI Group» kompanııasy kórmege qatysýǵa qyzyǵýshylyq tanytty.
Sapar barysynda R.Joshybaev «Green win» uıymynda da boldy.

EKSPO-2017 komıssary Qazaqstanda bıznesti damytý úshin jasalǵan jaǵdaıdy jáne QR-daǵy ınvestıtsııalyq klımattyń qolaılylyǵyn aıtty. Kelissózder sońynda belgııalyq kompanııa basshysy kórmege qatysýǵa daıyn ekenin jetkizdi.

Sonymen qatar osy basylymda «Svejıe ovoşı krýglyı god» degen materıal berilgen. «Madmar» jylyjaı kesheni Almaty mańyndaǵy azyq-túlik beldeýiniń damýyna eleýli úles qosýda. Qarasaı aýdanyndaǵy Isaev aýylynda ornalasqan «Madmar» jylyjaı kesheniniń jumysshylary túrli suryptaǵy qyzanaqtyń 200 tonnasyn jınaǵan kórinedi. Memlekettik baǵdarlamalardyń aıasynda bir jyl buryn iske qosylǵan bul keshenniń alǵashqy ónimi. Tıimdi jumys istep jatqan osy jylyjaı týraly bilgińiz kelse, materıaldy qarap shyǵyńyz.