Aýdan, qala ákimderin saılaý: Kandıdattardy usyný, tirkeý jáne saılaýaldy úgit qashan bastalady

Ortalyq saılaý komıssııasy tóraǵasynyń orynbasary Konstantın Petrov aýdandardyń jáne oblystyq mańyzy bar qalalardyń ákimi laýazymyna kandıdattardy usynýdyń, tirkeýdiń jáne saılaýaldy úgittiń qashan bastalatyndyǵyn aıtty, dep habarlaıdy QazAqparat tilshisi.

«Kandıdattardy usyný saılaý kúni taǵaıyndalǵannan keıingi kúnnen bastalady. Eger taǵaıyndaýdy erteńge kútsek, onda búrsúgini usyný bastalyp, ol daýys berý kúnine 30 kún qalǵanda aıaqtalady. «Saılaý týraly» Konstıtýtsııalyq zańǵa sáıkes, eger usyný merzimi aıaqtalǵan kúni eki kandıdattan kem usynylsa, onda aýmaqtyq saılaý komıssııasy usyný merzimin uzartýǵa quqyly», - dedi ol Ortalyq saılaý komıssııasynyń otyrysynda.

Onyń atap ótýinshe, saıası parııalar óz kandıdattaryn usyna alady. Sonymen qatar azamattardyń da kandıdat bolýǵa múmkindigi bar. Bul rette ózin óz usynǵan azamat saılaýǵa túsip otyrǵan saılaý okrýginde tirkelgen saılaýshylardyń jalpy sanynyń 1 paıyz qoldaýyn jınaýy qajet. Kandıdattardy tirkeý kezeńi 25 kúnge sozylady. Tirkeý qajetti barlyq qujattar usynylǵan soń bastalady jáne saılaý ótetin kúnge 25 kún qalǵanda aıaqtalady.

«Kandıdattar tirkelgennen keıin aýmaqtyq saılaý komıssııasy BAQ-ta kandıdatty tirkeý týraly sheshimin jarııalaýǵa mindetti. Saılaýaldy úgit tirkeý aıaqtalǵan soń birden bastalyp, 24 kúnge sozylady. Ádettegideı daýys berý úshin jergilikti ýaqyt boıynsha tańerteńgi 07-00-den 20-00-de deıin ýaqyt belgilengen. Vahtalyq ádispen jumys isteıtin azamattarǵa qolaıly bolýy úshin basqa ýaqyt belgilenýi, biraq, saǵat tańǵy 6—00-den erte emes, al 22-00-den kesh emes ýaqyt belgilenýi múmkin. Daýystardy sanaý 12 saǵattan astaýy qajet. Básekelesinen kóp daýys jınaǵan kandıdat saılandy dep sanalady», - dedi Konstantın Petrov.