Aýdan ákiminiń orynbasary Almaty áýejaıy mańynda úı salýǵa ruqsat berdi dep aıyptalýda

TALDYQORǴAN. QazAqparat - Almaty oblysy Eńbekshiqazaq aýdany ákiminiń orynbasary bılik pen laýazymdyq ókilettigin asyra paıdalandy degen kúdikke ilindi. Bul jóninde Sybaılas jemqorlyqqa qarsy qyzmetke silteme jasap QazAqparat habarlaıdy.

Almaty oblysynyń sybaılas jemqorlyqqa qarsy qyzmeti Eńbekshiqazaq aýdany ákiminiń orynbasaryna qatysty laýazymdyq ókilettigin asyra paıdalaný faktisi boıynsha sotqa deıingi tergeý júrgizip jatyr.

«Ol 2017 jyly Talǵar aýdany sáýlet jáne qala qurylysy bóliminiń basshysy qyzmetin atqara otyryp, Talǵar aýdanynyń Panfılov aýyldyq okrýginde Almaty qalasynyń halyqaralyq áýejaıyna jaqyn ornalasqan 16 jer ýchaskesiniń qurylys syzbasyna zańsyz kelisim bergen. Sol kelisim jalpy aýdany 0,96 ga bolatyn jer ýchaskesin azamattardyń jeke menshik quqyǵyn tirkeý jáne sáıkestendirý qujattaryn zańsyz daıyndaýǵa negiz bolǵan degen kúdik bar» delingen habarlamada

Kúdikti QR QPK 128-baby tártibimen ustalyp, ýaqytsha ustaý abaqtysyna qamaldy. Tergeý jalǵasýda.

Q PK 201-babyna sáıkes tergeý múddesine sáıkes basqa málimetter jarııalanbaıdy.

Ákim orynbasaryna qatysty túpkilikti sheshimdi sot shyǵarady