Aýdan ákimdikteri Memlekettik týdy paıdalanýda qatelikke jol bergen

NUR-SULTAN. QazAqparat – Jetisý oblysynda eki aýdan ákimdigi Memlekettik týdy ornatýda qatelikke jol bergen. Bul týraly QR Saýda jáne ıntegratsııa mınıstrligine qarasty Tehnıkalyq retteý komıtetinen málim etti, dep habarlaıdy QazAqparat tilshisi.

«Aǵymdaǵy jyldyń 6-9 qyrkúıegi aralyǵynda Jetisý oblystyq Tehnıkalyq retteý departamenti Kegen, Raıymbek aýdandarynyń memlekettik organdaryna Memlekettik rámizderdiń qoldanylýyna monıtorıng júrgizdi. Іs-sharaǵa aýdan ákimdikteri men máslıhattardyń apparattary, ishki saıasat, ekonomıka jáne bıýdjettik josparlaý, turǵyn úı-kommýnaldyq sharýashylyq, avtomobıl kóligi jáne turǵyn úı ınspektsııasy bólimderi qatysty», - delingen Tehnıkalyq retteý jáne metrologııa komıtetiniń habarlamasynda.

Monıtorıng nátıjesi boıynsha Kegen aýdany ákimdiginiń ǵımaratyna Memlekettik tý durys ornatylmaǵany, Raıymbek aýdany ákimdiginiń ǵımaratyndaǵy Memlekettik tý tozyp turǵany anyqtalǵan. Raıymbek aýdany ákimdigi kemshilikti birden túzetken.

«Sondaı-aq memlekettik satyp alý nátıjeleri boıynsha kásipkerler jetkizetin memlekettik rámizderdi ulttyq standarttarǵa sáıkestendirýdi júrgizý máseleleri boıynsha aýdandardyń ishki saıasat bólimderimen túsindirý jumysy júrgizildi», - dedi komıtetten.