Aýa raıy eskertýin elemeı jolǵa shyqqan 8 adam jaýapkershilikke tartyldy

ASTANA. QazAqparat – Tótenshe jaǵdaılar birinshi vıtse-mınıstri Ibragım Kúlshimbaev qardyń qalyńdyǵynan kólik qozǵalysy qıyndaǵan óńirlerdi atady, dep habarlaıdy QazAqparat tilshisi.

«Aýa raıyna monıtorıng júrgizilip, avtojoldardaǵy tótenshe jaǵdaılardy joıý jáne aldyn alý boıynsha tıisti sharalar qabyldanyp jatyr. Búginde avtokólikter jıi qalyp qoıatyn 3 myńnan astam jol ýchaskeleri anyqtaldy. Óńirler boıynsha qar qursaýynda kóbine Abaı, Aqmola, Aqtóbe, ShQO, Jambyl, Qaraǵandy, Qostanaı, Pavlodar jáne SQO avtokólikteri qalyp qoıyp jatady. Jolda qalatyndardyń kópshiligi aýa raıyna baılanysty eskertýlerdi elemeıtinder nemese jazǵy janarmaıdy qoldanatyndar», – dedi Ibragım Kúlshimbaev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, aýa raıy qolaısyzdyǵyna qatysty eskertýge qaramastan kólik tizgindeıtin jolaýshylardy jazaǵa tartý zańmen qarastyrylǵan.

Spıkerdiń dereginshe, jyl basynan beri 8 adamǵa qatysty ákimshilik hattama toltyrylyp, jaýapqa tartyldy.

TJM orynbasary kótergen kelesi másele kólik ıeleriniń belgilenbegen aýmaq jáne muz ústimen júrýi.

«Qys mezgili bastalǵaly Aqmola, Atyraý jáne Qyzylorda oblystarynda qaıǵyly jaǵdaıǵa ákelgen birneshe fakt tirkeldi. Sonymen qatar kóligimen birge muzǵa oıylyp ketken 8 jaǵdaı tirkeldi. Saldarynan 3 adam qaza tapty», - deıdi birinshi vıtse-mınıstr.

Buǵan deıin habarlaǵanymyzdaı, qys bastalǵaly 3 myńnan astam adam qar qursaýynan qutqarylǵan.