Aýa raıy eskertýin elemeı saıahatqa shyǵatyn týrıster de jazalanbaq

ASTANA. QazAqparat – Elimizde aýa raıy qolaısyzdyǵyna baılanysty eskertýge qulaq aspaı jolǵa shyqqany úshin jaza arqalaıtyndar qatary kóbeıe túspek. Tótenshe jaǵdaılar mınıstrligi erejege baǵynbaǵan kólik júrgizýshilerimen qosa týrısterdi de jazaǵa tartpaq. Bul týraly atalǵan vedomstvonyń birinshi vıtse-mınıstri Ibragım Kúlshimbaev málim etti, dep habarlaıdy QazAqparat tilshisi.

«Óńirlik tótenshe jaǵdaılar departamentteri men oǵan qarasty bólimshelerde týrısterdiń saıahattaý marshrýttary týraly málimetter joq. Osyǵan baılanysty qutqarýshylar joǵalǵan týrısterdi izdeýge kóp resýrs pen ýaqyt jumsaıdy. Taýly aımaqtarda joǵalǵan adamdy izdeý barysyna tómen temperatýra men jaýyn-shashyn tikeleı áser etedi. Osy oraıda biz barlyq óńir boıynsha Tótenshe jaǵdaılar departamentterine týrısterdiń júrip-turý marshrýttary týraly habar berý bastamasyn kóterip jatyrmyz. Sonymen qatar jergilikti TJD-dyń jumys isteý tártibi men quqyǵy aıqyndalmaq», - dedi Ibragım Kúlshimbaev OKQ-de ótken brıfıngide.

Onyń túsindirýinshe, atalǵan jańashyldyqty engizý «Qazaqstan Respýblıkasynyń keıbir zańnamalyq aktilerine azamattyq qorǵaý máseleleri boıynsha ózgerister men tolyqtyrýlar engizý týraly» ázirlenip jatqan zań sheńberinde josparlanyp otyr.

«Osylaısha aldaǵy ýaqytta joǵaryda atalǵan normalardy elemegeni úshin týrısterdi jaýapkershilikke tartý rásimin zańnamalyq deńgeıde retteýdi josparlap otyrmyz», - deıdi spıker.

Buǵan deıin birinshi vıtse-mınıstr aýa raıy eskertýin elemeı jolǵa shyqqan 8 kólik júrgiýshisiniń jaýapqa tartylǵany týraly aıtqan edi.