Aýa raıyna baılanysty 9 oblysta tas joldar jabyldy
KazAvtoJol-dyń baspasóz qyzmeti málim etkendeı, shektelgen ýchaskelerdiń jalpy uzyndyǵy 4 826 shaqyrymdy quraıdy.
Abaı oblysynda aýa raıynyń qolaısyzdyǵyna, atap aıtqanda, qalyń qar men aýa temperatýrasynyń tómendeýine baılanysty jalpy uzyndyǵy 1422 shaqyrymdy quraıtyn 4 avtomobıl jolynda kólik qozǵalysyna shekteýler qoıyldy.
Shekteý barlyq avtokólikterge qatysty.
«Semeı – Qalbataý – Buǵaz»;
«Taskesken – Baqty»;
«Qalbataý – Taskesken – Jetisý oblysynyń shekarasy»;
«Semeı – Qaınar».
Qardyń qalyń túsýine baılanysty Almaty oblysynda jáne kórshiles Jambyl jáne Jetisý oblystarynda aýa raıynyń qolaısyzdyǵyna baılanysty jalpy uzyndyǵy 635 shaqyrym bolatyn 3 tas jolda qozǵalys shektelgen:
«Jańaqurylys – Jambyl oblysynyń shekarasy»;
«Almataý týrbazasyna kireberis aımaq»;
«Aqy alý pýnkti - Jetisý oblysynyń shekarasy»;
«Shelek – Kókpek»;
«Alasa – Kegen – Narynqol».
Shyǵys Qazaqstan oblysynda aýa temperatýrasynyń -40°S-qa deıin tómendeýine baılanysty barlyq baǵyttar boıynsha jalpy uzyndyǵy 1 238 shaqyrymdy quraıtyn óńirdegi avtomobıl joldarynda kólik qozǵalysyna shekteý qoıyldy. Shekteý dızeldi jáne qoǵamdyq kólik túrlerine qoldanylady.
Jambyl oblysynda qardyń qalyń túsýine baılanysty Kenen jáne Qaınar aýyldarynyń arasyndaǵy uzyndyǵy 79 shaqyrymdy quraıtyn avtomobıl jolynda qozǵalysqa shekteý engizildi. Qozǵalys balama jol – eski Qordaı asýy arqyly juzege asyrylady.
Sondaı-aq, aýa raıynyń nasharlaýyna baılanysty jalpy uzyndyǵy 71 shaqyrym bolatyn Almaty oblysy men Qordaı aýylynyń shekarasy arasyndaǵy ýchaskede júk jáne qoǵamdyq avtokólikter úshin qozǵalys shekteý engizildi.
Jetisý oblysynda boranǵa, joldarda kórinistiń bolmaýyna jáne aýa raıynyń qolaısyzdyǵyna baılanysty, sondaı-aq, Abaı oblysyndaǵy shekteýlerge qatysty jalpy uzyndyǵy 671 shaqyrym bolatyn 4 tas jolda qozǵalysqa shekteý engizildi. Shekteýler tómendegi baǵyttarǵa qatysty qoıyldy:
«Kóktýma – Dostyq»;
«Almaty oblysynyń shekarasy – Aqy alý pýnkti»;
«Altynemel Asýy»;
«Almaty oblysynyń shekarasy – Úsharal – Abaı oblysynyń shekarasy».
Qostanaı oblysynda Ulytaý oblysynyń shekarasynan Arqalyq qalasyna deıingi uzyndyǵy 83 shaqyrym bolatyn tas jolda avtokóliktiń barlyq túrleriniń qozǵalysyna shekteý engizildi.
Ulytaý oblysyndaǵy aýa raıynyń qolaısyzdyǵyna baılanysty atalǵan ýchaske jabyldy.
Soltústik Qazaqstan oblysynda boran men kórinistiń bolmaýyna baılanysty Vozvyshenka jáne Roşınskoe aýyldarynyń arasyndaǵy jalpy uzyndyǵy 163 shaqyrym bolatyn avtomobıl jolynda avtokóliktiń barlyq túrleriniń qozǵalysy shektelgen.
Ulytaý oblysynda aýa raıynyń qolaısyzdyǵyna, atap aıtqanda, boran men kórinistiń bolmaýyna baılanysty Ulytaý aýyly men Qostanaı oblysynyń shekarasy arasyndaǵy uzyndyǵy 115 shaqyrym bolatyn jolda qozǵalysqa shekteý engizildi.
Qazirgi ýaqytta respýblıkalyq mańyzǵa ıe tas joldardy kútip ustaýǵa 704 birlik arnaıy tehnıka men 1438 qyzmetker jumyldyryldy.