Atyraýlyqtardyń 50 paıyzy koronavırýsty toıdan, bazardan, túngi klýbtan juqtyrǵan

ATYRAÝ. QazAqparat – Atyraý oblysynda kún saıyn 150 adam koronavırýs juqtyrady, dep habarlaıdy QazAqparat.

Oblys ákimi Mahambet Dosmuhambetovtiń tóraǵalyǵymen ótken keńeste óńirdegi epıdemıologııalyq ahýal men vaktsınalaý máselesi qaraldy. Oǵan oblys ákiminiń orynbasarlary, basqarmalar men joǵary oqý oryndarynyń basshylary, al, aýdandar ákimderi selektorlyq rejımde qatysty.

Atyraý oblystyq sanıtarlyq-epıdemıologııalyq baqylaý departamentiniń basshysy Mádenıet Tanaýovtyń málimetine, qańtar-maýsym aılarynda koronavırýs ınfektsııasyn juqtyrǵandardyń táýliktik kórsetkishi 87 adam bolǵan. Al, shildede bul kórsetkish 150-ge jetken.

«Koronavırýs ınfektsııasy anyqtalǵandardyń 53 paıyzy qaýipti vırýsty toı-tomalaq, eske alý is-sharalarynda, saýda úıleri men bazarlar, qoǵamdyq tamaqtaný oryndary men túngi klýbtarda juqtyrǵan. Al 25,9 paıyzy – naýqastarmen jaqyn qarym-qatynasta bolǵandar, 11,7 paıyzy qoǵamdyq kólikterde shaldyqqan. Turǵyndar sanıtarııalyq saqtyq sharalaryna nemquraıly qaraı bastady. Betperde taqpaý men áleýmettik araqashyqtyqty saqtamaý epıdemıologııalyq ahýalǵa keri áser etip otyr. Taǵy bir sebebi – jańa shtammnyń taralýy. Almatyǵa jiberilgen 43 synamanyń 18-nen «Delta» shtammy anyqtaldy. Bul shtamnyń juǵý deńgeıi eki ese joǵary, aýrý barysy aýyr formada ótedi», - dedi Mádenıet Tanaýov.

Oblystyq densaýlyq saqtaý basqarmasy basshysynyń mindetin atqarýshy Qaısar Abdýalıevtiń aıtýynsha, koronavırýs juqtyrǵandar sanynyń ósýine baılanysty Atyraý qalasynda rezervten 330 ınfektsııalyq tósek-oryn iske qosylǵan.

«Qaýipti vırýsqa shaldyǵýshylar sany óse berse, №2 oblystyq aýrýhanadaǵy 30 oryndyq ishek ınfektsııasy bólimin ınfektsııalyq statsıonarǵa aınalady. Oblystyq aýrýhananyń jańa korpýsynan 200 oryn daıyndaldy. Jaǵdaı ýshyqqan jaǵdaıda, ony tolyq ınfektsııalyq statsıonar etemiz. Sondaı-aq, temir jol aýrýhanasynan da oryndar daıyndaalady», -dedi Q.Abdýalıev.

Onyń málimetine súıensek, aqpan aıynan beri óńirge 141 200 doza vaktsına jetkizilgen. Al, 1 aqpan-7 shilde aralyǵynda vaktsına saldyrǵan adamdar sany 104 722-ge jetken. Vaktsınalaýǵa qatysty joǵary kórsetkish áskerı bólimderdiń sarbazdaryn qosa alǵanda quqyq qorǵaý organdaryna tıesili bolyp. Eń tómengi kórsetkish sozylmaly aýrýlary bar naýqastar (11%), stýdentter (11,4%) men pedagogter (50%) arasynda baıqalady.

Oblys ákimi Mahambet Dosmuhambetov epıdemıologııalyq ahýaldyń kúrdeligine baılanysty ásirese, densaýlyq saqtaý basqarmasy basshylyǵyna kez kelgen jaǵdaıǵa daıyn bolý kerektigin tapsyrdy.

Eske sala ketelik, budan buryn Atyraýdaǵy kardıologııalyq ortalyǵynda ınfektsııalyq statsıonar quralǵanyn jazǵan edik.