Atyraýlyqtardy 4 mln teńgege aldaǵan alaıaqtyń isi sotqa joldandy
Atyraý oblystyq polıtsııa departamentiniń baspasóz qyzmetinen málim etkendeı, kúdikti aldanǵan adamdardyń 4 mln teńgege jýyq qarjysyn jymqyrǵan.
«Krımınaldyq polıtsııa basqarmasynyń qyzmetkerleri 1988 jylǵy kúdiktiniń qańtar-naýryz aıy aralyǵynda turǵyndardy jumysqa ornalastyramyn dep aldap, qomaqty aqsha qarajatyn jymqyrǵany anyqtaldy. Kúdikti turǵyndardy iri munaı kompanııalaryna jumysqa ornalastyrý úshin árqaısysynan 100 myńnan 150 myń teńgege deıingi kólemde qarjy alyp otyrǵan. Sóıtip, Atyraý qalasynda turatyn 40-qa jýyq adamnyń 4 mln teńgedeı qarjysyn alaıaqtyq nıetpen jymqyrǵan», - dep habarlady departamenttiń baspasóz qyzmeti.
Polıtsııa qyzmetkerleri 1988 jylǵy kúdiktige qatysty QR Qylmystyq kodeksiniń 190-baby 3-bóligimen qylmystyq is qozǵady. Atalǵan bappen sotqa deıingi tergeý júrgizildi.
«Alaıaqtyq áreket jasaǵan kúdikti óziniń kinásin tolyqtaı moıyndady. Kúdikti ýaqytsha ustaý ızolıatoryna qamaýǵa alyndy. Tergeý kezinde anyqtalǵan 40 epızodty qylmystyq is sotqa joldandy», - dep málim etti departamenttiń baspasóz qyzmeti.
Eske sala ketelik, budan buryn Atyraý oblysynda kıberpolıtseıler jumysqa kiriskenin habarlaǵan bolatynbyz.
«Internettegi túrli resýrstar men áleýmettik jeliler arqyly alaıaqtardyń arbaýyna túsetinder artyp otyr. Qazir alaıaqtar ózin polıtsııa qyzmetkeri retinde tanystyryp, jaqyndary jol-kólik oqıǵasyna tap boldy, nemese basqa da zańsyz áreketterdi jasady dep aldaıdy. Osyndaı kıberqylmystardyń jańa túrin anyqtaý, aldyn alý maqsatynda «Kıberpol» toby quryldy», - dep málim etti departamenttiń baspasóz qyzmetinen.