Atyraýlyqtar jalpyhalyqtyq dıktant jazýǵa qatysty
Mádenıet jáne sport mınıstrligi uıymdastyrǵan sharanyń maqsaty - jańa qazaq álipbıin nasıhattaý, latyn qarpindegi qazaq álipbıin is júzinde meńgerýge daǵdylandyrý. Latyn qarpindegi jalpyhalyqtyq dıktant 14 qarasha kúni bir mezgilde saǵat 11.00-de bastaldy. Al munaıly óńirde jergilikti ýaqyt boıynsha 10.00-de ótti.
«Atyraý oblysynda jańa qazaq álipbıinde dıktant jazý sharasymen 80 myńnan astam adamdy qamtý josparlanǵan edi. Biraq meniń oıymsha, bul kórsetkish odan da kóp bolady. Jalpy statıstıkany keıinirek mamandar shyǵarady. Bizdiń basty mindetimiz - halyqtyń latyn álipbıine kóshýge qanshalyqty daıyn ekenin bilý», - dedi tilderdi damytý basqarmasynyń basshysy Ásııa Qystaýbaeva.
Aıta keteıik, latyn grafıkasyndaǵy álipbıge negizdelgen tuńǵysh jalpyhalyqtyq dıktantqa Qazaqstannyń 2 mıllıonǵa jýyq turǵyny qatysty. Olardyń arasynda belgili qoǵam qaıratkerleri, aqyn-jazýshylar, ártister men sportshylar bar.
Astanadaǵy QR Ulttyq akademııalyq kitaphanasynda kóppen birge dıktantty belgili qoǵam qaıratkeri Myrzataı Joldasbekov, qazaqstandyq ártister Maıra Muhamedqyzy, Turar Álipbaev, Nurbolat Arzamas, Baqtııar Adamjan, aqyn-jazýshylardan Nesipbek Aıtuly, Roza Muqanova, Qonysbaı Ábilov, sportshylardan Serik Aqtaev, Aıbek Oralbaı, Áıgerim Ábilqadyrova, Talǵat Zarýbekov, Rınat Seknazarov, telejýrnalıs Láıla Sultanqyzy jáne basqalary jazdy.
Dıktant mátini 80-ge jýyq sózden turdy. Jazýǵa eseptelgen ýaqyt - 30 mınýt. Taqyryby - «Rýhanı jańǵyrý» baǵdarlamasy.
Qazaqstandyqtar dıktantty arnaıy belgilengen oryndarda jáne emle.kz, tilalemi.kz saıttarynda, «Shalqar» jáne Qazaq radıo arnalarynda tikeleı efırde mátin aýdıosyn tyńdaı otyryp jazdy.