Atyraýlyqtar saıası repressııa qurbandaryn eske aldy

ATYRAÝ. QazAqparat - Búgin, 31  mamyrda Atyraýda ótken 20-30  jyldary qýǵyn-súrgin qurbandary bolǵandarǵa arnalǵan memorıalǵa gúl qoıý rásimi ótti, dep habarlaıdy Atyraý oblystyq óńirlik kommýnıkatsııalar qyzmeti.

 Jeńis saıabaǵyndaǵy memorıalǵa gúl qoıý rásimine qoǵamdyq uıymdardyń ókilderi,  memlekettik qyzmetshiler, máslıhat depýtattary, soǵys ardagerleri, quqyq qorǵaý organdarynyń qyzmetkerleri,  repressııa qurbandarynyń  urpaqtary qatysty.

 Atyraý oblysynda eki myńnan astam adam repressııaǵa ushyraǵan.

Sharaǵa oblys ákimi Nurlan Noǵaev qatysyp, eldiń jarqyn bolashaǵy úshin bastaryn qaterge tikken qurbandardy óskeleń urpaq árkez este saqtaýy kerek ekenin atap ótti.

-Jıyrmasynshy ǵasyrda otandastarymyz qýǵyn-súrginge ushyrady,  kóp qıyndyq kórdi. Qazaqstanda 103 000  adam tergeýden ótti, 25000  adam qatań jazalandy. Bizdiń beıbit ómirimiz úshin babalarymyz tókken qan men terdi jadymyzdan shyǵarmaýymyz kerek. Memleket basshysy jalpyhalyqtyq kelisimniń negizi beıbitshilik,  meıirim men ádilet  sekildi qundylyqtardy qazaqstandyqtardyń jete sezinýlerinde ekenin árkez aıtyp keledi,-dedi Nurlan Noǵaev.
 

-Tarıhymyzdyń bul paraǵy da esimizde bolýy tıis. Aǵa býynnyń mindeti jastardy otanshyldyq rýhta tárbıeleý. Táýelsizdik úshin kúreskenderdi aıtyp otyrýymyz kerek. Búginde Elbasynyń kóregen saıasaty arqasynda Qazaqstan táýelsiz,  quqyqtyq memleket boldy. Ár adam órkendegen,  turaqty elde turýǵa laıyq. Birligimizdi saqtaýdyń mańyzy zor. Ókinishti ótkenimizdi eske ala otyryp,  endi qaıtalanbaýyn tileıik. Bolashaǵymyz jarqyn, sáýleli bolsyn».