Atyraýlyqtar kólikke 355 mln teńge salyq tólemegen

ATYRAÝ. QazAqparat – Atyraý oblysy turǵyndarynyń kólik salyǵyna bereshegi 355 mln teńgege jetken, dep habarlaıdy QazAqparat.

Oblystyq Memlekettik kirister departamentiniń basqarma basshysy Nurbolat Sarmanovtyń málimetinshe, 9 myńǵa jýyq turǵyn kólik salyǵyn tólemegen. Olardyń bereshegi qazir 355 mln teńgeni qurap otyr. Negizgi qaryz 283 mln teńgege jýyqtasa, 72 mln teńgeden astamy – ósimpul.

«Eń úlken qaryz somasy Atyraý qalasynda tirkelip otyr. Shahar turǵyndarynyń kólik salyǵyna 278 mln teńge kóleminde bereshegi bar. Odan keıin Jylyoı aýdanyndaǵy avtokólik ıeleri 37 mln teńge kóleminde salyq tólemegen. Al Qurmanǵazy aýdany júrgizýshileriniń memleketke qaryzy 16,5 mln teńgege jetti», - deıdi Nurbolat Sarmanov.

Onyń aıtýynsha, kólik ıeleriniń kóbi salyqqa salǵyrt qaraıdy. Kólik salyǵy aılyq eseptik kórsetkish negizinde esepteletindikten, jyl saıyn ósip otyrady. Onyń ústine jeńil avtokólik 2013 jyldyń 31 jeltoqsanynan keıin qurastyrylsa nemese osy ýaqyttan keıin Qazaqstan aýmaǵynda tirkelgen bolsa, onda salyq kólemi tipten ulǵaıady.
«Máselen, 3000-3200 tekshe santımetr – 35 AEK, 3200-3500 tekshe santımetr – 46 AEK, 3500-4000 tekshe santımetr – 66 AEK, 4000-5000 tekshe santımetr – 130 AEK jáne 5000 tekshe santımetrden joǵary – 200 AEK dep belgilengen. Salyq tóleý úshin memlekettik kirister organdaryna barýdyń qajeti joq. «e-Salyq Azamat» mobıldik qosymshasyn ornatý arqyly salyq kólemin bilip, onlaın tóleý jetkilikti. Sondaı-aq qazaqstandyqtar ekinshi deńgeıli bankterdiń qosymshalaryn paıdalana alady«, -deıdi Nurbolat Sarmanov.

Aıta keteıik, 2022 jyldyń 1 sáýirinen bastap elimizde 1 AEK – 3180 teńgege teń.