Atyraýlyqtar Ekinshi dúnıejúzilik soǵysta qaza tapqandardy qurmetpen eske aldy

Atyraý. QazAqparat - Búgin Atyraý oblysynda Uly Jeńistiń 73 jyldyǵyna oraı Jeńis saıabaǵynda ótken Uly Otan soǵysy bozdaqtaryn eske alý sharasy keń kólemde atalyp ótti. Bul sharaǵa 10 soǵys ardageri qatysty, dep habarlaıdy QazAqparat tilshisi.    

Sondaı-aq, Atyraý oblysy turǵyndary men qonaqtary Máńgilik alaý janynda soǵys jyldarynda qyrshynynan qıylǵan bozdaqtardy bir mınýttyq únsizdikpen eske aldy. Odan soń Qazaqstan Respýblıkasynyń Gımnin birlese shyrqap, búgingideı beıbit ómirge shúkirshilik tanytty. Sondaı-aq, sazdy áýenmen sarbazdar eskertkishke gúl destelerin qoıdy.

Máńgilik alaýǵa oblys ákimi, oblystyq ardagerler keńesi atynan gúl shoqtaryn qoıýmen bastalǵan rásimdi Uly Otan soǵysynyń ardagerleri, Atyraý oblysy Qazaqstan halqy Assambleıasy, aýǵan, «Batys» óńirlik qolbasshylyǵy men Іshki ister departamenti jáne Tótenshe jaǵdaılar departmenti tájik-aýǵan soǵysynyń ardagerleri, jáne basqa da ujymdar da qatysty. 

Budan soń qaladaǵy mekemeler men uıymdardyń, iri óndiristik kásiporyndar, memlekettik jáne quqyq qorǵaý organdary, oblys ákimi apparatynyń jáne jergilikti basqarmalar men departamentterdiń qyzmetkerleri, úkimettik emes uıymdar ókilderi, joǵary jáne arnaýly oqý oryndarynyń stýdent jastary, mektep oqýshylary, qala turǵyndary men qonaqtary Máńgilik alaýǵa baǵyt aldy.  

 Qalalyq jumyspen qamtýdy úılestirý jáne áleýmettik baǵdarlamalar basqarmasynyń basshysy Nurly Habıevanyń aıtýynsha, Atyraý oblysynda qazir 30 soǵys ardageri, 1 kontslager tutqyny, 1 habarsyz ketken soǵysqa qatysýshynyń jesiri bar.

«Jeńis kúnine oraı Atyraý oblysyndaǵy soǵys ardagerleri jergilikti bıýdjetten 300 myń teńge aldy. Jyl saıyn demeýshiler esebinen qarııalar Qazaqstan men TMD elderindegi shıpajaılarǵa jiberiledi. Búgingi sharaǵa densaýlyqtaryna baılanysty kóp ardagerler qatysa almady, kópshiligi tósek tartyp jatqan adamdar, -dedi Nurly Habıeva.

 Gúl shoqtaryn qoıýǵa arnalǵan saltanatta oblys ákimi Nurlan Noǵaev jınalǵan jurtshylyqty Uly Jeńis kúni meıramymen quttyqtady.

«Atyraý oblysynan 43 myńǵa jýyq jaýynger soǵysqa attandy, 13 myńy qaıta oralmady. Qazir 3 myń tyl ardageri men 30 soǵys ardageri ortamyzda bar. Erlikterińizge qurmetpen bas ıemiz. Memleket basshysy aıtqandaı, ár otbasynda soǵys salǵan iz qaldy. Sondyqtan bul kúndi urpaqtar jadynda atalarymyzdyń, ákelerimizdiń erligi, batyrlyǵy qalýy úshin atap ótemiz», dedi.

Máńgilik alaýǵa gúl qoıý rásimine jalpy sany 10 myńnan astam adam qatysty. Qaza tapqan erler rýhyna arnap, qarýdan oq atý rásimi júrgizildi.