Atyraýlyqtar aýlaǵan alyp qortpadan 35 keli ýyldyryq alyndy

NUR-SULTAN. QazAqparat – Atyraý balyqshylary jýyrda Jaıyq ózeniniń «Kishi Damby» tartymynan salmaǵy 200 kelige jýyq qortpa aýlaǵan bolatyn. Bekire tuqymdas baǵaly balyqtan 35 keli ýyldyryq alyndy, dep habarlaıdy QazAqparat QR EGTRM Balyq sharýashylyǵy komıtetiniń baspasóz qyzmetine silteme jasap.

Uryqtanǵan ýyldyryqtar dernásildik kezeńge deıin ınkýbatorlarǵa ornalastyrylady. Sodan keıin olar basseınderde jetilip, ósirý toǵandaryna aýystyrylady. Ósirilgen jas bekire tuqymdas qortpa shabaqtary bıylǵy shilde-tamyz aılarynda tabıǵı ortaǵa jiberiledi.

Balyq sharýashylyǵy komıtetiniń baspasóz qyzmeti analyq qortpanyń jaǵdaıy qanaǵattanarlyq ekenin habarlaıdy. Úısindirý áreketiniń nátıjesine qaraı, analyq balyq shabaqtardy kóbeıtý maqsatynda toǵandarda ósiriledi. Al jasandy jaǵdaıda ustaý múmkin bolmasa, Kaspıı teńizine jiberiledi.

Komıtettiń balyq ósirý kásiporyndary jyl saıyn memlekettik tapsyrys sheńberinde resýrstardy jasandy túrde molaıtý jónindegi is-sharalardy júzege asyrady.

Osy jylǵy maýsym bastalǵannan beri «Oral-Atyraý bekire balyq ósirý zaýyty» RMQK bekire balyq túrleriniń 55 danasyn aýlady.

Bıyl tabıǵı mekendeý ortasyna baǵaly balyq túrleriniń 93,1 mln. shabaǵyn, onyń ishinde 7,5 mln. bekire shabaqtaryn shyǵarý josparlanǵan.

Buǵan deıin jazylǵandaı, 19 sáýirde Atyraý balyqshylary 200 keli tartatyn alyp qortpa aýlady.