Atyraýlyq Jaıyq ózeninen alyp jaıyn ustady
Atyraýlyq áýesqoı balyq aýlaýshynyń biri – Lenar Mýborakshaev. Birneshe jyldan munaıly shahardy qaq jara aǵyp jatqan Jaıyq ózeninen balyq aýlaıdy. Jaqynda onyń qarmaǵyna alyp jaıyn tústi.
«Balyq aýlaýdyń ózindik qyzyǵy kóp. Birinshiden, taza aýada demalasyń. Ekinshiden, ýaqytyńdy tıimdi ótkizesiń. Ózenge qarmaq salǵan balyqshylar alyp balyq ustaǵandy qalaıdy. Alaıda, bul – sırek kezdesetin jaıt» -deıdi Lenar Mýborakshaev.
Áýesqoı balyqshy Jaıyq ózeninen aýlaǵan jaıynnyń salmaǵy – 30 kılo, uzyndyǵy – 1,5 metrden astam.
Sarǵysh tústi alyp jaıyn alystan qarasańyz, altyn túske boıalǵandaı. Jaıyndy Jaıyqtan tartyp shyǵarý ońaı bolmady. Degenmen, sýdan marjan súzýdiń qyr-syryn jetik meńgergen Lenar Mýborakshaev qarmaǵyna túsken oljasynan aıyrylǵan joq.
«Qazir Jaıyq ózeninde sazan, jaıyn, ózge de qara balyqtar bar. Biraq burynǵydaı emes, balyq múldem azaıǵany baıqalady. Keıde qarmaqqa eshteńe túspeýi múmkin. Balyq ta árkimniń nesibesine qaraı qarmaqqa túsedi. Osyndaı alyp balyqty qabýy ǵajap emes. Jaıyndy Jaıyq ózeniniń qalanyń ortalyǵyndaǵy bóliginen aýladym», -deıdi Lenar Mýborakshaev.
Bıylǵy kóktemde Atyraý balyqshylary 200 keli tartatyn alyp qortpa aýlaǵan edi.
Alyp qortpany memlekettik tapsyrysty oryndaý maqsatynda 19 sáýirde «Amangeldi atyndaǵy» JShS-niń balyqshylar brıgadasy Jaıyq ózenindegi «Kishi Damby» tartymynan aýlady. Baǵaly balyqty aýlaýǵa «Jaıyq-Atyraý bekire balyq ósirý zaýyty» RMQK-niń qyzmetkerleri de qatysty. Sý marjanynyń salmaǵy shamamen 200 kelige jýyq. Baǵaly qortpa bekire balyqtaryn ósirý zaýytyna jetkizildi.
Keıin odan tabıǵı meken etý ortasyna jiberý úshin ortasha salmaǵy 15 grammdy quraǵan 729 myń shabaq alyndy.
Eske sala ketelik, budan buryn Atyraýda Jaıyq ózenine 3,5 mln bekire tuqymdas balyq shabaǵy jiberildi.