Atyraýlyq stýdentter Geıdar Álıev atyndaǵy stıpendııaǵa ıe boldy
Ýnıversıtet rektory Salamat Idrısovtyń aıtýynsha, 2012 jyldan beri oqý ornynda ázerbaıjan halqynyń tarıhy men mádenıetin zertteý ortalyǵy jumys isteıdi.
«Bul ortalyqty ashýdaǵy maqsat – baýyrlas elder arasyndaǵy yntymaqtastyq pen rýhanı baılanysty nyǵaıtý. Sol jyldan beri ýnıversıtettiń úzdik stýdentterine Ázerbaıjan Respýblıkasynyń birinshi prezıdenti Geıdar Álıev atyndaǵy halyqaralyq stıpendııa berilip keledi», -deıdi Salamat Idrısov.
Bıylǵy halyqaralyq stıpendııaǵa oqýda jáne qoǵamdyq jumysta úzdik dep tanylǵan 5 stýdent ıe boldy. Olar – fızıka, matematıka jáne aqparattyq tehnologııalar fakýltetiniń stýdenti Jansezim Qýandyqova, kóptildi bilim berý fakýltetiniń stýdenti Erlan Baımuhanov, gýmanıtarlyq ǵylymdar jáne óner fakýltetiniń stýdenti Geogorıı Shaposhnıkov, jaratylystaný jáne aýylsharýashylyq fakýltetiniń stýdenti Ásel Aıýpova men ınnovatsııalyq bilim berý fakýltetiniń stýdenti Sanjar Temirbolatov.
Atyraýlyq stýdentterge stıpendııany tapsyrý is-sharasyna Ázerbaıjan Respýblıkasynyń Aqtaý qalasyndaǵy bas konsýldyǵynyń basshysy Elchın Mamedov pen mádenıet jáne bilim jónindegi keńesshi Ilkın Orýdjov qatysty.
«Bıyl Ázerbaıjan Respýblıkasynyń táýelsizdigin nyǵaıtyp, ekonomıkasyn órkendetýge, baýyrlas jáne ózge memlekettermen áriptestik baılanysyn óristetýge úles qosqan Geıdar Álıevtiń týǵanyna 100 jyl tolady. Osyǵan oraı, Atyraý ýnıversıtetiniń stýdentteri arasynda shyǵarmashylyq konkýrs ótip, úzdik stýdentterge halyqaralyq stıpendııa berilip otyr. Bul – baýyrlas elder arasyndaǵy berik baılanystyń dáleli», - deıdi Elchın Mamedov.
Eske sala ketelik, budan buryn Atyraý ýnıversıtetteri Túrkııada oqıtyn qazaqstandyq stýdentterdi qabyldaýǵa daıyn ekenin jazǵan edik.