Atyraýlyq stýdentke el Prezıdentinen hat keldi

ATYRAÝ. QazAqparat – El Prezıdentinen atyraýlyq stýdent Abaı Nursultanovqa hat keldi, dep habarlaıdy QazAqparat.

Prezıdenttiń hatyn Chehııadaǵy kolledjde oqıtyn stýdentke Atyraý oblysynyń ákimi Mahambet Dosmuhambetov tapsyrdy.

Abaı Nursultanov 2016 jyly Atyraý qalasyndaǵy №38 mektep-lıtseıdiń 9-synybyn bitirgen. Al, 2017 jyly Cheh Respýblıkasyndaǵy kolledjge oqýǵa túsken. Qazir chehııalyq kolledjdegi halyqaralyq qatynastar fakýltetiniń 4-kýrs stýdenti.

Bıylǵy aqpannan beri qashyqtan bilim alyp júr. Ol jaqynda Prezıdentke jastarǵa kórsetilip otyrǵan qoldaý úshin hat jazǵan.

Prezıdent Qasym-Jomart Toqaevtyń hatynda «Qurmetti Abaı! Táýelsizdik jyldarynda biz ózimizge degen senim turǵysynan belsendi ómir súretin patrıot, maqsaty aıqyn jáne jaýapty jastar urpaǵyn ósirdik. Dál Sizderdiń qatarlaryńyz – Táýelsizdiktiń 30 jyldyǵynyń jarqyn sımvoly. Oqýyńdy aıaqtaǵan soń bilimińdi otanymyzdyń ıgiligi úshin jumsaıtynyńa senimdimin» - delingen.

Abaı Nursultanov Prezıdentke jazǵan hatyna jaýap keletinin oılamaǵan.

«Meniń jazǵan hatym Memleket basshysyna jetpeıtin shyǵar dep oıladym. Alaıda, jaýap hat kelgennen keıin ár adamnyń daýysy Prezıdentke jetetinine sendim», -deıdi Abaı Nursultanov.

Oblys ákimi Mahambet Dosmuhambetov shetelde bilim alatyn stýdentke jarqyn bolashaq tiledi. Sondaı-aq, Prezıdenttiń artqan úmitin aqtaıtynyna senim bildirdi.

Eske sala ketelik, buǵan deıin atyraýlyq 8 jasar qyz álemniń sýpermodeli atanǵanyn habarlaǵan edik.