Atyraýlyq shahmatshy qyz álem chempıonatynda el namysyn qorǵaıdy
Oblystyq dene shynyqtyrý jáne sport basqarmasynyń baspasóz qyzmetinen málim etkendeı, Atyraý qalasynda shahmattan 20 jasqa deıingi shahmatshylar arasynda el chempıonaty márege jetti.
El chempıonatyn Qazaqstan shahmat federatsııasy men Ǵ.Aıdaralıev atyndaǵy Atyraý oblystyq shahmat federatsııasy uıymdastyrdy.
Bul birinshilik Atyraýda úshinshi ret ótip otyr.
«Sharshy taqta ústindegi básekege elimizdiń 15 óńirinen 80 shahmatshy qatysty. Atalǵan dodada álemniń eki dúrkin chempıony, FIDE sport sheberi, atyraýlyq Zarına Nurǵalıeva shahmattyń «blıts» túri boıynsha chempıondyq ataqqa ıe boldy. Endi jas shahmatshy Grýzııa Respýblıkasynda ótetin álem chempıonatynda el namysyn qorǵaıdy», -dep habarlady basqarmanyń baspasóz qyzmeti.
Jasóspirim shahmatshy Zarına Nurǵalıevany Atyraý oblysynyń shahmattan aǵa jattyqtyrýshysy Sabyrbaı Ǵaısın men FIDE jáne halyqaralyq sport sheberi, Azııa chempıony Jánibek Amanov jattyqtyrady.
Aqyldylar oıynynyń qyr-syryn meńgergen jas shahmatshy 2019 jyly Belarýs Respýblıkasynda ótken álem chempıonatynda 12 jasqa deıingi jasóspirimder arasynda álem chempıony atandy.
Al 2021 jyly FIDE uıymdastyrǵan jyldam shahmattan álem kýboginde qola júldege ıe bolǵan.
Eske sala ketelik, buǵan deıin atyraýlyq jasóspirim shahmatshy Zarına Nurǵalıeva álem chempıony atanǵanyn habarlaǵan bolatynbyz.
Ótken jyly Rýmynııa elinde shahmattan álem chempıonatynda da Zarına Nurǵalıeanyń baǵy jandy.
Sóıtip, ekinshi ret álem chempıony atandy.
«Ol klassıka sanatynda 14 jasqa deıingi qyzdar arasynda qarsylastarynyń bárinen basym tústi. Osylaısha, atyraýlyq jasóspirim shahmatshy 11 kezeńde 9 jınady. Bul jeńisi onyń álem chempıony atanýyna dańǵyl jol ashty», - dep habarlaǵan edi basqarmanyń baspasóz qyzmeti.