Atyraýlyq otbasy balasyn emdetemiz degen jeleýmen Aýǵanstanǵa attanbaq bolǵan
Bul oqıǵa Atyraý oblysynda bolǵan edi.
Keıin adasqan otbasynyń otaǵasymen teolog, dintanýshy, Nur-Múbárak Egıpet Islam mádenıeti ýnıversıtetiniń doktoranty, respýblıkalyq aqparattyq nasıhat tobynyń múshesi Serikjan Enshibaı túrmede kezdesti.
Arnaıy qyzmet mamandary bul otbasynyń shetel aspaq bolǵan nıetin bilip qoıǵan.
Otbasy páterin satyp, qujat ázirlep, qaryzǵa kóp somada aqsha izdeı bastaǵan.
Jaqyndaryna Reseıge baryp naýqas balasyna ota jasatamyz dep syltaý aıtqan.
Beıbit elinen bezip, Vazırıstannan baqyt izdegen otbasyny áýejaıda turǵan jerinen UQK qyzmetkerleri ustady.
Keıin otaǵasyna terrorızm jáne ekstremızm babymen qylmystyq is qozǵalyp, túrmege jabyldy.
«Men onymen túrmede otyrǵanda jolyqtym. Oqıǵasyn óz aýzynan estidim. Bul jigit te radıkal salafızm aǵymyna ergen. Keıin 6 aı boıy júrgizilgen ońaltý jumystarynan soń jaımen óziniń raıynan qaıta bastady. Qandaı qatelik jasadyń desem, meshitke jolamaǵanym – qatelik boldy deıdi. Olar meshitke kelmeıdi, meshitte memlekettiń adamdary bar dep sanaıdy. Sharıǵatpen istemeıdi. Memlekettik saıasatty kápir memlekettiń saıasaty dep sanaıdy. Meshitke múlde jolamaıdy. Bulardyń kósemi - Saıd Býrıatskıı bolǵan. Olar Reseı arqyly Aýǵanstanǵa, odan qaqtyǵys ordasy Vazırıstanǵa ketpek bolǵan. Negizi Atyraýdan Vazırıstanǵa kóp adam ketti. Bizdiń túrmedegi keıipkerimiz de Atyraýdyń Juldyz eldi mekeninen. Baryp kelgender boldy. Kelgenderdiń kópshiligi sottaldy. Ketýge oqtalǵandar da qylmystyq is jasady dep sanalady. Shet memlekette bolyp jatqan qaqtyǵystarǵa qatysý zańmen qýdalanady. Al áıelderge jeńildik jasaldy. Sebebi olar kúıeýleriniń yqpalymen, aıtýymen ketti. Bul jigittiń de áıeliniń arqasynda kiltin taptyq. Ár adamǵa ózinshe áser etýge tyrysamyz. Kúıeýińiz áli raıynan qaıtpaı otyr dep áıeline aıttyq. Sottalǵandar otbasymen birneshe ret kezdesedi. Sol kezdesýge baryp júrip áıeli de onyń kózqarasyna yqpal etti», - dedi Serikjan Enshibaı.
Sanasy ýlanǵan azamattarmen jumys tek qana teologtyń kezdesýimen bitpeıtini anyq. Adamdy mıyna sińip qalǵan kózqarastan aınytýǵa aılar da jyldar da jetpeýi múmkin.
Ońaltýǵa kónbeıtinderi de bar.
Bul jumysqa tek qana memleket emes, psıholog, týǵan týystary, aınalasy, baýyrlary, tipti BAQ, qoǵam bolyp atsalysýy tıis.
Terrorızm men ekstremızmniń túbirine balta shabýǵa jumylyp eńbek etý kerek.