Atyraýlyq oqýshylar Telegram-da kitaphana ashty
Bilim ordasy baspasóz qyzmetiniń málimetinshe, jańa jobanyń avtorlary – 9-synyp oqýshylary Elnar Kamel men Saǵıden Kóshalıev. Olar onlaın-kitaphana formatyndaǵy Telegram-bot oılap tapqan.
Ideıa avtorlarynyń pikirinshe, «NisBooksBot» servısine matematıka, bıologııa, fızıka, hımııa, ınformatıka, geografııa, Qazaqstan tarıhy jáne dúnıejúzi tarıhy pánderi boıynsha Nazarbaev Zııatkerlik mektepteriniń 7–12 synyptaryna arnalǵan oqýlyqtary, sondaı-aq halyqaralyq IELTS jáne SAT emtıhandaryna daıyndyq testeri júktelgen. Mundaǵy kitaptar jalpy bilim beretin mektepterdiń oqýshylaryna da paıdaly oqý quraly bolmaq.
«Karantın kezinde qaǵaz túrindegi kóptegen kitaptardy tabý qıyn. Ustazdarymyz kitaptardyń elektrondy nusqalaryna silteme jiberedi. Alaıda, júıeniń jıi isten shyǵýynan kitaptardy júkteý uzaq ýaqyt alady. Osyǵan baılanysty ustazdar men oqýshylardyń jumysyn ońaılatý úshin barlyq oqýlyqty bir servıske jınadyq. Siltemeni dostarymyzǵa messendjerler arqyly taratamyz. «NisBooksBot» servısinde kitapty ońaı júkteýge, telefonda da, kompıýterde de saqtaýǵa bolady. Aldaǵy ýaqytta kitaptardy oqý toqsandaryna bólip júktegimiz keledi. Sonda ony telefonǵa júktep alý budan da tezirek bolady», - deıdi Elnar men Saǵıden.
Endi olar servıstiń múmkindigin keńeıtýdi kózdep otyr. Bolashaqta sabaq kestesin, kórkem ádebıet kitaptary men Nazarbaev Zııatkerlik mektepterine oqýǵa túsýge arnalǵan daıyndyq testerin júktemek.
Eske sala ketelik, budan buryn qazaqstandyq 5 oqýshy halyqaralyq bıznes-grantqa ıe bolǵanyn jazǵan edik.