Atyraýlyq oqýshylar elorda ǵımarattarynyń kóshirmesin jasady
Atalmysh mekteptiń baspasóz hatshysy Ánýar Jamanqulovtyń aıtýynsha, 10-ǵa jýyq maketter arasynda áıgili «Báıterek» monýmenti, «Han shatyr» saýda, oıyn-saýyq ortalyǵy, Kólik jáne kommýnıkatsııalar mınıstrliginiń ǵımaraty, «Severnoe sııanıe» kópqabatty turǵyn úı kesheni, halyq arasynda Pıramıda atalyp ketken «Beıbitshilik jáne kelisim» saraıy men «Aqorda» rezıdentsııasy da bar. Arhıtektýralyq nysandardy oqýshylar «El júregi - Astana» merekelik onkúndigi aıasynda jasady. Barlyq maketterdi jasaý úshin birneshe keli polıvınılhlorıd (PVH) jáne kádimgi jelim paıdalanylǵan.
«Oqýshylar bul maketterdi óner sabaǵynda daıyndady. Aldymen ár nysannyń syzbasyn jasap aldyq. Sodan soń kerek materıaldardyń kólemin anyqtadyq. Toptyq jumystyń nátıjesinde osyndaı buıymdar shyǵady», - deıdi óner pániniń muǵalimi Danııar Oljaǵalıev.
Pán muǵaliminiń aıtýynsha, eńbek sabaǵynda jasalǵan bul týyndylar balalardy tek qolónerge mashyqtandyryp qana qoımaı, olardyń matematıkadaǵy jáne beıneleý pánderinde alǵan bilimin tájirıbede pysyqtaýǵa múmkindik beredi. Qol matorıkasyna jaǵymdy áser etetin bul jumys túri balanyń qııalyna erik berip, oqýshy men ustazdyń arasynda erkin qarym-qatynastyń ornaýyna septigin tıgizedi.
Oqýshylardyń qolynan shyqqan sáýletti nysandardyń arasynda kózdi eleń etkizetini «Aqorda» rezıdentsııasy. Muny oqýshylar shamamen on kúnde aıaqtaǵan. Biri «Aqordanyń» qabyrǵasyn turǵyzsa, endi biri ǵımarattyń terezelerin uqyptylyqpen ornatqan. Kóshirmeniń túpnusqaǵa uqsaýy úshin balalar túrli tústi boıaýlar men 12 volttyq dıod shamdaryn paıdalanǵan. Aqordanyń salmaǵy - 5 keli. Uzyndyǵy - 1,5 metr, al eni 1 metrge jýyqtaıdy.
«Men úshin bul ǵımaratty jasaýda eshqandaı qıyndyq týǵan joq. Bizder áýeli topqa bólingen soń árkim ǵımarattyń belgili bólikterin daıyndaýǵa jaýapty boldy. «Aqordanyń» maketin barlyǵymyz birge aıaqtadyq. Nátıjesi meniń kóńilimnen shyqty», - deıdi maketti qurastyrǵan Dana Qýanysheva.
Aıta keteıik, qazir daıyn buıymdar mekteptiń kórkine sán berip, kelýshilerdi tánti qylýda. Astananyń 20 jyldyǵyna oraı uıymdastyrylǵan bul art-galereıa kórme retinde jyl aıaǵyna deıin jumys isteıdi. Osylaısha elimizdiń bas qalasyna ózindik tartýyn jasaǵan atyraýlyq oqýshylar eki qala arasyn bir taban jaqyndatqandaryna dán rıza.