Atyraýlyq oqýshylar bıleıtin robot qurastyrdy
Atyraýdaǵy Abaı ortalyǵynda 7-11 synyp oqýshylary úshin tegin STEAM kýrsy bar. Munda mektep oqýshylary túrli robottar qurastyryp, ǵylymı jobalarmen aınalysady. Máselen, JasSpace keńistiginde qosymsha bilim alyp júrgen Qurmet Áıipqalıev pen Dámeli Kishibaı bıleıtin robot qurastyrǵan. Qurmet munaıly shahardaǵy №28 mekteptiń 7-synybynda, al Dámeli APEC kolledjiniń 1-kýrsynda oqıdy.
«Biz bıleıtin robotty qurastyrýǵa eki aı ýaqytymyzdy jumsadyq. Robottyń birneshe ereksheligi bar. Birinshiden, robot «Qara jorǵa» bıin bıleıdi. Ekinshiden, aınaladaǵy adamdarmen baılanys jasaıtyn múmkindigi bar. Úshinshiden, kúrdeli qımyl-qozǵalysty jasaı alady. Tórtinshiden, etnostıldegi robot ýltradybystyq datchık arqyly qosylady», - dep túsindirdi Dámeli Kishibaı.
Oqýshylardy ónertapqyshtyqqa Dııar Ábýhanov baýlyp júr. Onyń aıtýynsha, oqýshylardyń robot qurastyrýǵa qyzyǵýshylyǵy zor. Buǵan teorııadan góri praktıkalyq jumysqa basymdyq berý septigin tıgizgen.
«Shetelde jańa tehnologııaǵa, ásirese túrli robottar qurastyrýǵa basa den qoıylyp otyr. Robot adam eńbegin almastyryp jatyr. Bolashaqta Qazaqstannyń jas ónertapqyshtary básekege qabiletti jańa tehnologııalar oılap tabatynyna senemin. Al, biz bastapqyda robotty kartonnan daıyndap, tekserip kórdik. Keıin maketti penopleksten jasap shyǵardyq. Basqarý baǵdarlamasyn ázirlep, ony ardýıno platasyna quıdyq. Sóıtip, tetikti basqanda, robot bıleıtindeı múmkindik jasadyq. Munan soń robotty odan ári jetildirýdi oılastyrdyq. Qazir robot rolık arqyly qozǵalady. Endi ony aıaǵymen júrip, adamnyń qımyl-áreketin kóbirek jasaıtyndaı etkimiz keledi», - dep aldaǵy josparymen bólisti Qurmet Áıipqalıev.
Eske sala ketelik, budan buryn atyraýlyq oqýshy qyz asaý úıretip, at ústinen sadaq atatynyn habarlaǵan bolatynbyz.