Atyraýlyq oqýshy volonterlerge arnalǵan mobıldik qosymsha jasap shyǵardy
Atyraýdaǵy Nazarbaev Zııatkerlik mektebiniń 12-synyp oqýshysy Bıbarys Ǵılaj «Shańyraq» mobıldik qosymshasyn jasap shyǵarǵan. Qosymsha qaıyrymdylyq pen áleýmettik jobalardy júzege asyratyn volonterlerge arnalǵan.
Ol bul jumysy úshin 31 naýryzda «Avtorlyq quqyqpen qorǵalatyn obektilerge quqyqtardyń memlekettik tizilimge málimetterdi engizý týraly» kýáligin aldy.
Mobıldik qosymshada áleýmettik jelide sııaqty tirkelýshiler jeke profıldik-akkaýnt ashyp, ózge de qoldanýshylardy qaýymdastyqtarǵa engize alady.
«Qazirgi aqparattyq keńistikte qazaqstandyq eriktilerdiń basyn qosatyn, olar týraly resmı málimetter beretin derekter qory joq. Bul qosymsha arqyly osyndaı problemalardy sheshýdiń jolyn izdedim», - deıdi ónertapqysh Bıbarys Ǵılaj.
Onyń aıtýynsha, jobany daıyndaý úshin ǵylymı resýrstardy zerttegen. Nátıjesinde avtorlyq patentpen birge, álemniń aqparattyq-tehnologııalar salasyndaǵy kez kelgen ýnıversıtetinde tegin oqýǵa múmkindik almaq. Qazir ol baǵdarlamalaý tilin tolyq meńgerýdi maqsat etip otyr.
«Bıbarys Ǵılaj –Qazaqstan jastary kongresiniń ınnovatsııalyq jobalar baıqaýynyń jeńimpazy, respýblıkalyq jáne halyqaralyq IT-tehnologııalar men robototehnıka konkýrstarynyń júldegeri. Onyń daıyndaǵan mobıldik qosymshasy belgili qaýipterdi aldyn alýǵa, jasyryn derekterdiń taralmaýyna septigin tıgizbek. Qosymshada tek árbir adamǵa qajetti negizgi fýnktsııalar qoljetimdi bolady. Munda qajetsiz jarnamalar men spam eskertýler bolmaıdy», -deıdi oqýshynyń ǵylymı jetekshisi, ınformatıka pániniń muǵalimi Qazbek Ázerbaev.