Atyraýlyq oqýshy bir aıda polıtsııaǵa 4 márte jalǵan habar bergen
Oblystyq polıtsııa departamentiniń baspasóz qyzmetinen málim etkendeı, 10-synyp oqýshysy polıtsııaǵa jalǵan habar berýdi 28 naýryzda bastaǵan.
«Atyraý qalalyq polıtsııa basqarmasynyń 102 operatoryna habarlasyp, 28 naýryzda keshki saǵat 21:58 shamasynda mán-jaıdy túsindirmesten M.Baımuhanov kóshesinde ornalasqan páterge polıtsııa qyzmetkerlerin shaqyrtqan. Al, 26 sáýirde №31 mekteptiń aýlasynda ornalasqan fýtbol alańynda jasóspirim balalar tóbelesip jatqanyn habarlaǵan. Budan keıin 29 sáýir saǵat 22:48 shamasynda Baıqońyr kóshesinde ornalasqan oıyn alańynda belgisiz adamdar avtokólikterge tas laqtyratynyn aıtqan. Tórtinshi ret 30 sáýirde kópir mańynda 14-15 jastaǵy jasóspirimder elektroshoker men bótelke ustap, tóbeleskeli júrgenin jetkizgen. Polıtsııa qyzmetkerleri atalǵan derekterdi tekserip, berilgen habarlardyń tórteýi de jalǵan ekenin anyqtady», -dep habarlady departamenttiń baspasóz qyzmeti.
Tekserý kezinde jalǵan habar berip júrgen Atyraý qalasyndaǵy mekteptiń 10-synybynda oqıtyn 16 jasar jasóspirim ekeni belgili boldy.
Osyǵan baılanysty jasóspirimniń anasyna – 39 jastaǵy azamatshaǵa QR Ákimshilik quqyqbuzýshylyq týraly kodeksiniń 438-babynyń 1-bólimimen ákimshilik hattama toltyrylyp, 30 aılyq eseptik kórsetkish kólemindegi aıyppul 50 paıyz jeńildikpen salyndy.
Aıyppul somasy 45 945 teńgeni qurady.
Eske sala ketelik, budan buryn Atyraýda bástesýden utylǵan oqýshy polıtsııaǵa jalǵan habar bergenin jazǵan edik.