Atyraýlyq muǵalim gir sportynan álem chempıony atandy

ASTANA. QazAqparat – Atyraýlyq alǵashqy áskerı daıyndyq pániniń muǵalimi Rıshat Ǵalıahmetov gir sportynan álem chempıony atandy. Bul týraly QazAqparat Oqý-aǵartý mınıstrliginiń baspasóz qyzmetine silteme jasap habarlaıdy.

Rıshat Ǵalıahmetov Atyraý oblysy Qyzylqoǵan aýdanyndaǵy Qarakól orta mektebinde AÁD páni muǵalimi bolyp jumys isteıdi. Ol keıingi 10 jyl boıy gir kóterý sportymen aınalysyp keledi.

«Ákem dene shynyqtyrý pániniń muǵalimi bolǵan. Men onyń izin jalǵastyryp kelemin. Men de ákem sııaqty balalardy salaýatty ómir saltyn ustanýǵa baýlyǵym keldi. Al, ol úshin aldymen ózim belsendi bolýym kerek. Mine, gir kóterý sportymen 10 jyldan beri aınalysamyn. Gir kóterýden álem chempıonatynda elimizdiń namysyn qorǵap, taǵy da jeńiske jetkenime óte qýanyshtymyn. Qazir birneshe shákirtim meniń jolymdy qýyp keledi. Olar Qazaqstan chempıonatyna qatysyp júr», - dedi Rıshat Ǵalıahmetov.

Jarys Úndistannyń Nıý-Delı qalasynda 27 qazan men 1 qarasha aralyǵynda ótti. Oǵan 13 elden 234 sportshy qatysty.

Aıta ketsek, bul – ustazdyń ekinshi jeńisi. Buǵan deıin ol Şýchınsk qalasynda ótken Azııa chempıonatyna qatysyp, altyn medal jeńip alǵan.