Atyraýlyq qutqarýshylarǵa 7 órt sóndirý deposy men 214 tehnıka qajet
Parlament Májilisiniń depýtaty Ádil Jubanovtyń aıtýynsha, Atyraý oblysyndaǵy aýdandarda órt sóndirý depolar apattyq jaǵdaıda tur.
Keıbiri talapqa sáıkes emes.
«Birinshi kezekte Atyraý oblysyna 7 órt sóndirý deposyn salý kerek. Onyń 3-eýi kóleminiń eki esege ulǵaıýyna baılanysty Atyraý qalasyna, 1-eýi shahar mańyndaǵy Atyraý aýyldyq okrýgine qajet. Jylyoı aýdanynyń ortalyǵy – Qulsary qalasynda 1, Qurmanǵazy aýdanyndaǵy Aqkól aýylynda 1, Maqat aýdanyna qarasty Dossor kentinde 1 órt sóndirý deposy ashylǵany jón», -deıdi Ádil Jubanov.
Onyń aıtýyna qaraǵanda, bıyl Qyzylqoǵa aýdanynyń Mııaly aýylyndaǵy órt sóndirý deposynyń qurylysyn aıaqtaý kózdelgen.
Al, Isataı aýdanynyń ortalyǵy – Aqqystaý aýylyndaǵy depo qurylysy merdigerdiń jaýapsyzdyǵynan toqtap qalǵan.
Inder aýdanyna qarasty Inderbor kentindegi depo qurylysy jer teliminiń qurylys salýǵa sáıkes kelmeýine baılanysty bastalmaǵan.
«Atyraý oblystyq tótenshe jaǵdaılar departamentine 33 birlik negizgi, 27 birlik arnaıy, qosymsha 154 birlik kómekshi tehnıka qajet. Oblystyq ákimdik arqyly 2023-2026 jyldar aralyǵynda «Lızıng» baǵdarlamasymen departamentke 33 birlik avtokólikti satyp alý josparlanyp otyr. Batpaqty jerlerde órt sóndirýge arnalǵan arnaıy tehnıkalardy, atap aıtqanda, 3 birlik «Rýsak-3918 «Sever»», «Trekol Vega», «Vezdehod Petrovıch 354-71» avtokóligin respýblıkalyq bıýdjet esebinen satyp alý máselesi sheshilýi kerek», -deıdi Ádil Jubanov.
Eske sala ketelik, budan buryn Kaspıı jaǵalaýynda janǵan qamys tútini Atyraýdy basyp qalǵanyn habarlaǵan bolatynbyz.
Kaspıı jaǵalaýynda janǵan qamys órti 5 kúnnen keıin sóndirildi.