Atyraýlyq qutqarýshylar órtengen qoradan 50 lıtr gaz ballondaryn alyp shyqty

ATYRAÝ. QazAqparat – Atyraý oblysynda qutqarýshylar órtengen qoradan gazǵa toly 50 lıtrlik ballon alyp shyqty, dep habarlaıdy QazAqparat.

Oblystyq tótenshe jańdaılar departamentiniń qoǵammen baılanys tobynan málim etkendeı, órt 6 maýsymda Maqat aýdanynda bolǵan.

«Departamenttiń dıspetcherlik pýltine 6 maýsym kúni saǵat 15:16-da Maqat aýdanynda tutanǵan órt týraly habar tústi. Jalyn №402 temirjol beketindegi «Azamat» jeke sharýashylyǵyna qarasty qystaqtyń qorasynan shyqqan. Órt sóndirýshiler jalyn sharpyǵan qoradan 50 lıtr 4 gaz ballony men 50 lıtrlik 2 ottegi ballonyn qaýipsiz jerge shyǵaryp úlgerdi», - dep habarlady departamenttiń qoǵammen baılanys toby.

Órt saǵat 16:58-de oqshaýlanyp, saǵat 17:15-te joıyldy.

Al, keshki saǵat 19:41-de Atyraý-Inder baǵytyndaǵy jolda Kia Sorento túgi qalmaı, janyp ketti. Kólik órti saǵat 20:21-de sóndirildi.

«Júrgizýshiler órt qaýipsizdigi erejelerin saqtaýy kerek. Órttiń aldyn alý úshin kólikti tehnıkalyq tekserýden ýaqytynda ótkizip, árdaıym órt sóndirgish birge alyp júrgen jón. Kóliktiń motor bóliginde shúberek, karton, bógde tez tutanatyn zattardy ustamaý qajettigin eskertemiz», - dep málim etti qoǵammen baılanys tobynan.

Eske sala ketelik, budan buryn Atyraýda saıajaıdaǵy turǵyn úıge jylan kirip ketkenin jazǵan edik.