Atyraýlyq kásipker múmkindigi shektelgen 12 adamdy turaqty jumyspen qamtydy
Qyzylqoǵa aýdandyq ákimdiginiń baspasóz qyzmetinen málim etkendeı, «Mııaly» múgedekter qoǵamdyq birlestiginiń tóraǵasy Asylbek Muratov eki jyl buryn úıiniń janynan jıhaz tsehyn ashqan.
«Úıimniń janyndaǵy ǵımaratty jıhaz tsehyna laıyqtap, 2021 jyly kásibimdi bastadym. Kásibimdi bastaý úshin túrli baǵdarlamalar arqyly jeńildetilgen nesıe alǵan joqpyn. Aldaǵy ýaqytta tseh aýmaǵyn ulǵaıtýdy josparlap otyrmyn. Tsehta 16 adamdy turaqty jumys isteıdi. Aýdandyq jumyspen qamtý, áleýmettik baǵdarlamalar jáne azamattyq hal aktilerin tirkeý bólimi arqyly múmkindigi shekteýli 12 adamdy jumysqa qabyldadym. Onyń ishinde birinshi toptyń múgedegi de bar», -deıdi Asylbek Muratov.
Qazir tsehta kereýet, ústel, shkaf sekildi jıhazdar jasalady. Jumsaq jıhazdardyń tysyn aýystyryp beredi.
«Bala kezimnen ártúrli zattardy qurastyrýdy unatatyn edim. Qazir jıhaz tsehynda daıyn taqtaılardy burǵylaý quralynyń kómegimen qurastyramyn. Bizdiń jıhazdarymyzǵa turǵyndar tarapynan tapsyrys kóp túsedi. Tapsyrys berýshiler jıhaz sapasyna syn aıtqan emes», -deıdi І toptaǵy múmkindigi shekteýli jan Mahambet Serikqalıev.
Eske sala ketelik, budan buryn Atyraýda múgedektigi bar adamdardy ońaltýǵa arnalǵan 150 oryndyq ortalyq salynatynyn habarlaǵan bolatynbyz.
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, jańa ortalyqtyń aýmaǵy 12 myń sharshy metrden asady.