Atyraýlyq eki jigit bir otbasynyń úsh adamyn ajaldan arashalap qaldy
Mahambet aýdany ákimdiginiń málimetine súıensek, jaqynda Sarytoǵaı aýylynda turatyn Abzal Joldasov úıiniń aýlasynda qazylǵan jórtóleniń ishin syrlaǵan. Alaıda syrdyń ıisine ýlanǵan er adam esinen tanyp qalǵan. Ony qutqarýǵa umtylǵan áıeli Jumasulý men qyzy Gúlfaırýzdyń basy aınalyp, qulap qalǵan. Áke-sheshesi men apaıyn qutqarý úshin kishkentaı Jaınar jedel járdemge habarlap, kórshilerden kómek suraǵan.
Oqıǵa ornyna jedel járdem bırgadasy 10-15 mınýtta jetken. Kólik júrgizýshisi Ardaq Ojyraev jertólege túsip, Gúlfaırýzdy syrtqa shyǵarǵan. Biraq syrdyń ıisinen basy aınalyp, jertólege qaıta túse almaǵan. Jedel járdem qyzmetkerleri júrgizýshige alǵashqy medıtsınalyq kómek kórsetip, esin jıǵyzǵan.
Sol kezde aýyl turǵyny Tórebek Qumarov jertólege túsken. Alaıda, jertólede kóp jatyp qalǵan erli-zaıyptynyń denesi isinip, terge malshynyp ketkendikten, joǵaryǵa kóterip shyǵarý ońaı bolmaǵan. Aldymen Jumasulýdy syrtqa shyǵarǵan. Biraq, óziniń ábden álsiregenin sezedi. Al, Abzaldy jertóleniń esigine deıin jetkizgenin ǵana biledi.
«Ústime qansha shelek sý tókse de, esimdi jınaı almappyn. Kózimdi ashqan soń bárine kúle qarap, amandasa berippin. Bir kózimdi ashqanda, Abzaldy jedel járdem kóligine salyp jatqanyn kórdim. Qyzym ekeýmizdi aýrýhanaǵa aparyp, dárigerler suıyqtyq quıyp, qajetti em-domyn júrgizdi. Qazir jaǵdaıymyz jaqsaryp, balalarymyzdyń ortasyna oraldyq. Ardaq pen Tórebek úsheýmizdi ajaldan arashalap qaldy», - deıdi Jumasulý Dúısenova.
Erli-zaıyptylardy jertóleden shyǵarǵan Tórebek Qumarov ta Sarytoǵaı aýylynda turady. Jylyoı aýdanynda ornalasqan «Teńiz» ken ornyndaǵy merdiger – «Senimdi qurylys» JShS-da jumys isteıdi.
«Qınalǵan janǵa kómek berý ár adamnyń qolynan keledi. Shynymdy aıtsam, Abzaldyń kishkentaı qyzynyń jylaǵanyn kórip, shydap tura almadym. Bul ómirde balalardyń jylaǵanyn kórýden qıyn ne bar? Sol sebepten, jertólege túsip, eki adamdy qutqarýdan basqa oı bolmady», - deıdi Tórebek Qumarov.
Eske sala ketelik, buǵan deıin atyraýlyq sportshy gir kóterýden álem chempıony atanǵanyn jazǵan edik.