Atyraýlyq dızaıner Londonda halyqaralyq baıqaýdyń birinshi júldesin ıelendi
Atyraýda turatyn baspa dızaıneri Nazerke Işanova kompıýterdik grafıkanyń Digital Art stılinde elektrondy qalammen kartına salyp júr.
Jaqynda onyń sondaı úlgide salynǵan «Munar kún» kartınasy London qalasynda ótken «Altyn talanttar ýaqyty» halyqaralyq baıqaýynyń birinshi júldesin ıelendi.
Onlaın formattaǵy baıqaýǵa álemniń 39 elinen 200-ge jýyq úmitker qatysqan.
«Halyqaralyq baıqaýdyń jarnamasyn áleýmettik jeliden kórgen edim. Byltyrǵy qarashada birneshe kartınanyń arasynan bireýin tańdap, baǵymdy synap kórý úshin jiberdim. Bul baıqaý 2007 jyldan beri turaqty ótip keledi», -deıdi Nazerke Işanova.
Jergilikti dızaınerdiń aıtýynsha, 1836-1838 jyldary halyq azattyq kóterilisiniń kósemi Isataı Taımanulynyń týǵanyna 230 jyl tolýyna oraı daıyndalǵan «Asqaq rýh» kitabynyń betteýshi-dızaıneri bolǵan.
Sol kezde tarıhshy ǵalymdar men ólketanýshylardyń zertteý eńbekterimen tanysqan.
Keıin batyr Mahambet Ótemisuly men aqyn Yǵylman Shórekulynyń Isataı týraly jyrlaryn qyzyǵa oqypty.
Sol kezde qııalynda batyrdyń kesek tulǵasy qalyptasa bastaǵan.
«Qazaq degen uly halyqtyń shynaıy ǵumyrdastany áli jazylyp bitken joq. Ultymyzdyń ǵumyrdastany jazyla beredi. Bul kartınamdy azattyqtyń aq tańyn ańsap kútken, ólsheýli ómiri at ústinde joryqpen ótken Uly Dala batyry Isataı Taımanulynyń asqaq rýhyna arnadym», -deıdi dızaıner Nazerke Işanova.
Ol el táýelsizdigi úshin qanyn tógip, janyn bergen ult batyrlary men respressııaǵa ushyraǵan Alash arystary ómirin, eńbegin zerttep júr. Qazir onyń qorynda ult zııalylarynyń, batyrlar men arystardyń 50-den astam kartınasy bar. Kartınanyń bári Digital Art stılinde salynǵan.
Eske sala ketelik, budan buryn atyraýlyq sýretshi ózi turatyn aýylda galereıasyn ashqanyn jazǵan edik.
Foto: jeke muraǵatynan