Atyraýlyq depýtat jalǵyzbasty ákege baspana syılady

ATYRAÝ. QazAqparat - Atyraýda 20 jyldan beri turaqty baspanasy joq Qaırat Alıpanov búgin qonys toıyn toılady. Jalǵyzbasty ákege barlyq jaǵdaıy jasalǵan jaıly úıdi qalalyq máslıhattyń depýtaty, «Nur Otan» partııasy Atyraý fılıaly fraktsııasynyń múshesi Álibek Semǵalıev syıǵa tartty, dep habarlaıdy QazAqparat tilshisi.

Kúni búginge deıin qurqyltaıdyń uıasyndaı syz tartqan jer úılerdi jaldap, kóship-qonyp júrgen Qaırat Alıpanovpen birge ujymdastary da qýanýda. Baspana kiltin tapsyrý rásiminde olar qazaqy dástúrmen shashý ashyp, án salyp, jańa úıge quran oqytty.

«Nur Otan» partııasy Atyraý oblystyq fılıalynyń baspasóz hatshysy Elmıra Tuńǵatarovanyń aıtýynsha, fraktsııa múshesi, Atyraý qalalyq máslıhatynyń depýtaty  Álibek Semǵalıev jalǵyzbasty ákeniń taǵdyry jaıynda kezdeısoq estip qalǵan. Er azamattyń  kóterip júrgen aýyr júgin bólisip, Elordanyń 20 jyldyq merekesi qarsańynda táýelsiz memleketimizdiń bir otbasyna qýanysh syılaýdy uıǵarǵan.

«Qaırat - qaısar jan. Ujymymyzda eńbek etkenine 10 jyldan asyp ketti. Óte uqypty, adamgershiligi zor. Balalaryna baryn tosyp otyrǵan qamqor áke. Bizde santehnık bolsa, qasymyzdaǵy taǵy bir balabaqshada aýla sypyrýshy bolyp eńbek etedi. Balalarynyń túsinbegen sabaqtary bolsa, ishtegi pedagogtarǵa kórsetip, keńes alyp júredi. Ujymdastar da qoldan kelgen kómekterin aıamaı, kıim-keshekterin, artyq zattaryn usynýǵa tyrysady. Kóp qınaldy. Anasyz bala tárbıeleý óte aýyr ekenin jaqsy bilemiz. Álibek Semǵalıevtyń bul azamattyq isi kópshilikke úlgi bolarlyqtaı. Óte rızamyz»  deıdi №27 balabaqshanyń meńgerýshisi Gúlaıym Kashkenova.

Qaırat Alıpanov jastaıynan ata-anasynan aıyrylyp, jetimder úıinde tárbıelengen.

«Balalarym men kórgen qıyndyqtardy kórmesin. Emin-erkin óz úıińe kirip-shyǵyp, eshkimge páteraqy tólemeı kún keshkenge ne jetsin. «Elbasymyz, elim» dep emirengen  ultjandy azamattardyń basyn biriktergen «Nur Otan» partııasy jasaı bersin», -  dedi ol.

Aıta ketý kerek, ıgilikti sharaǵa elimizge belgili kásipker, bloger, Almaty qalalyq máslıhatynyń depýtaty Qaırat Qudaıbergen de qatysty. Ol Alıpanovtar otbasyna qajetti jıhazdardy syıǵa tartty.