Atyraýlyq balyq óńdeýshiler 500 keli qara ýyldyryqty satýǵa shyǵardy

ASTANA. QazAqparat - Atyraýlyq balyq óńdeýshi kásiporyndar 500 keli qara ýyldyryq saýdalaý múmkindigine qol jetkizip otyr. Bul týraly OKQ-da ótken baspasóz máslıhatynda Atyraý oblysynyń ákimi Nurlan Noǵaev málim etti, dep habarlaıdy QazAqparat tilshisi.

«Ózderińiz biletindeı, Atyraý oblysy - balyq sharýashylyǵyn damytýǵa asa kóńil bólip otyrǵan óńirlerdiń biri. Qazir toǵanda eki mekeme qyzyl balyq túrlerin asyraýmen aınalysyp jatyr. Olardyń jobalyq kórsetkishteri: kompanııalardyń biri jylyna 60 tonna balyq jáne 1 tonnaǵa deıin qara ýyldyryq, al ekinshi kásiporyn 100 tonna taýarly balyq eti jáne 1 tonnaǵa deıin qara ýyldyryq óndirip otyr», - dedi óńir basshysy.

Nurlan Noǵaevtyń aıtýynsha, qazirgi tańda balyq sharýashylyǵymen aınalysatyn kásiporyndardyń jumysy qyzý júrip jatyr. 

«500 kelige jýyq qara ýyldyryqty óndirip, kásiporyndar ony ózimizde jáne alys-jaqyn shetelderge satýǵa múmkindik alyp otyr. Bizge balyq aýlaýǵa berilgen kvotany qazirgi tańda balyq salasynda qyzmet atqaryp júrgen 17 mekeme tolyǵymen qoldanýda», - dedi Nurlan Noǵaev.

Ákim óz sózinde atap ótkendeı, balyq salasyndaǵy 17 mekemeniń ekeýinde eýrokod bar. ıAǵnı, ol kásiporyndar ónimin Eýropa elderine ótkizý múmkindigine ıe. Nurlan Noǵaevtyń aıtýynsha, ózenderdi tereńdetý jumysynyń arqasynda balyqshylar Qıǵash, Jaıyq ózenderinde balyq túrleriniń kóbeıgenin baıqaǵan.