Atyraýlyq áıel páterinde júıkege áser etetin dárilerdiń 1 myńǵa jýyq danasyn saqtaǵan

ATYRAÝ. QazAqparat – Atyraýda 48 jastaǵy áıel páterinde psıhotroptyq dárilerdiń 1 myńǵa jýyq danasyn saqtaǵan, dep habarlaıdy QazAqparat.

Oblystyq polıtsııa departamentiniń bastyǵy, polıtsııa polkovnıgi Nurhat Orazbaevtyń aıtýynsha, keshe, 28 naýryzda páterinde​ psıhotropty dárilerdiń iri partııasyn zańsyz saqtaǵan áıel ustalǵan.

«Ustalǵan áıeldiń páterin tintý júrgizý kezinde 114 dana «Tramadol», 18 dana «Lırıka» plastınkasy, 82 dana «Tropıkamed» aq tústi qutysyn, 10 dana «Somnol» plastınkasy, jatyn bólmesinen 725 dana «Tropıkamed» qutysy tabyldy. Sondaı-aq, azamattardyń jeke basyn kýálandyratyn 35 kýáligi men qujaty, 1 mln 375 myń teńge tárkilendi. Kúdikti psıhotroptyq esirtki zattaryn qaryzǵa alǵan adamdardyń qujattaryn kepil retinde alǵan. Bir páterde psıhotropty dárilerdi zańsyz satqan. Al, kórshi páterde kóp mólsherde psıhotropty dári saqtaǵan», -deıdi Nurhat Orazbaev.

Qazir ustalǵan áıelge qatysty tergeý amaldary bastaldy.

Eske sala ketelik, buǵan deıin Atyraýda zańsyz aınalymnan 5 myńnan astam psıhotropty dári tárkilengenin habarlaǵan bolatynbyz.