Atyraýlyq Ahmad, Batyrhan, Ismaıl esimdi úshem perzenthanadan shyqty

ATYRAÝ. QazAqparat – Atyraýda Ahmad, Batyrhan, Ismaıl esimderi berilgen úshem perzenthanadan shyqty. Keıingi eki jyldaǵy alǵashqy úshem 6 qyrkúıekte dúnıege kelgen, dep habarlaıdy QazAqparat tilshisi.

16 qyrkúıekte úshem oblystyq perınataldyq ortalyqtan úıine shyǵaryldy. Úshemdi shyǵaryp alýǵa áke-sheshesiniń aǵaıyn-týystary men oblystyq densaýlyq saqtaý basqarmasynyń basshysy Ashan Baıdýálıev qatysty.

Basqarma basshysynyń aıtýynsha, oblysta bıylǵy segiz aıda 11 333 náreste dúnıege kelgen. Onyń ishinde 114 egiz bar. Al, úshem sońǵy jyldary alǵash tirkelip otyr.

«Oblystyq perınataldyq ortalyqta 6 qyrkúıekte Aıangúl Sábıtova úshemdi dúnıege ákeldi. Nárestelerdiń úsheýi de – ul. Sábılerdiń ekeýiniń salmaǵy birdeı, ómirge kelgen sátte – 1 keli 800 gramm, al úshinshisiniń salmaǵy 2 keli 200 gramm boldy. Úshem de, olardyń anasy da on kún boıy dárigerlerdiń baqylaýynda jatty», - dedi Ashan Báıdýálıev.

Basqarma basshysy jas otbasyny qýanyshymen quttyqtap, ákimdik atynan balalar arbasyn syıǵa tartty.

Atyraýlyq jas otbasy Eset Qumar men Aıangúl Sábıtovanyń shańyraǵynda buǵan deıin bir ul bolǵan. Ákesi men sheshesi jańa týǵan sábılerge Ahmad, Batyrhan, Ismaıl esimderin bergen.

«Meniń de, áıelim Aıangúldiń de otbasynda úshem bolyp dúnıege kelgen týystarymyz joq. Biz úshem dúnıege keletinin alǵash estigende tańqaldyq. Árıne, qýanyshymyzda shek bolmady. Bul – qudireti kúshti Allanyń bizge bergen qaıtalanbas syıy», - deıdi úshemniń ákesi Eset Qumar.

Eske sala ketelik, budan buryn Atyraýda sońǵy eki jylda alǵash ret úshem dúnıege kelgenin habarlaǵan bolatynbyz.