Atyraýlyq 80-ge jýyq bala Reseıdegi pansıonatqa demalýǵa attandy

ATYRAÝ. QazAqparat – Atyraý oblystyq bilim basqaramasy basshysynyń mindetin atqarýshy Aınagúl Dúısekenovanyń málimetinshe, kópbalaly jáne áleýmettik osal otbasynan 79 bala «Qazaqstan geology» pansıonatyna attanyp ketti, dep habarlaıdy QazAqparat tilshisi.

«Atalǵan pansıonat Reseıdegi Jeleznovodsk pen Pıatıgorsk qalalarynyń aralyǵyndaǵy Inozemtsevo kentindegi Beshtaý baýraıynda ornalasqan. Lagerde atyraýlyq balalardyń jaıly ári qyzyqty ýaqyt ótkizýi úshin barlyq jaǵdaı jasalǵan. Demalys kezinde balalarǵa mádenı, sporttyq baǵdarlamalar, konkýrstar uıymdastyrylyp, túrli fılm kórsetiledi. Qyzyqty is-sharalardan basqa, demalýshy balalar sol mańdaǵy qalalarǵa saıahattap, tarıhymen tanysady. Pansıonat aýmaǵynda voleıbol men basketbol, shaǵyn fýtbol, badmınton men úlken tennıske arnalǵan alańdar bar. Tabıǵattyń tańǵajaıyp sulýlyǵy, taza aýa jáne emdik mıneraldy sý balalarǵa qýat berip qana qoımaı, demalysty tıimdi ótkizýge, densaýlyǵyn nyǵaıtýǵa kómektesedi», - deıdi «Qazaqstan geology» medıtsınalyq pansıonaty dırektorynyń mindetin atqarýshy Sholpan Esqalıeva.

Onyń aıtýynsha, pansıonatqa balalar tek jazda ǵana emes, jyl boıy qabyldanady. Munda balalardyń demalysy men saýyǵýyn uıymdastyrýǵa barlyq múmkindik bar.

Eske sala ketelik, buǵan deıin Atyraý oblysynda 130 myńnan astam bala saýyqtyrý sharalarymen qamtylatynyn jazǵan bolatynbyz.