Atyraýlyq 3 naýqas 380 mln teńgeniń qymbat dárisimen qamtylǵan

ATYRAÝ. QazAqparat – Byltyr «Qazaqstan halqyna» qory arqyly atyraýlyq 4 naýqas qymbat dárimen qamtamasyz etilgen. Onyń ishinde 3 naýqasqa 380 mln teńgeniń dárisi satyp alynǵan, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, byltyr oblystyq densaýlyq saqtaý basqarmasy úsh naýqastyń qymbat dári qamtylýyn uıymdastyrǵan. Al, bir naýqas «Qazaqstan halqyna» qoryna ózi júgingen.

«Ótken jyldyń sáýir aıynda Atyraý oblysynan «Berardınellı Seıptiń jalpylanǵan lıpodıstrofııasy» dıagnozymen eki bala «Metreleptın» dárilik zatymen qamtyldy. Dáriniń jalpy quny – 201 mln teńge. Al, qarasha aıynda «Dıýshendi bulshyqet dıstrofııasy» dıagnozy qoıylǵan 18 jasqa tolmaǵan naýqas 179 mln teńge turatyn «Kasımersen» dárilik zatymen qamtyldy. Atyraý qalasynan «Qazaqstan halqyna» qoryna ózi kómek alýǵa júgingen onkologııalyq esepte turǵan naýqasqa ótken jyldyń mamyr aıynda «Rıbotsıklıb» dárisi alynyp berilgen», -dep habarlady óńiplik kommýnıkatsııalar qyzmeti.

Eske sala ketelik, budan buryn Atyraýda balalar aýrýhanasyna 126 mln teńgeniń úsh preparaty satyp alynǵanyn habarlaǵan edik.

Oblystyq balalar aýrýhanasy baspasóz qyzmetiniń aqparatyna qaraǵanda, Nýsınersen (Spınraza) preparatynyń bireýi 42 mln teńge turady.

«Nýsınersen preparaty omyrtqadaǵy julynnyń bulshyq et atrofııasyn emdeýge arnalǵan. Eritindi omyrtqaǵa egiledi. Julynnyń bulshyq et atrofııasy nemese SMA – julynnyń aldyńǵy múıizderindegi motorly neırondarynyń údemeli degeneratsııasynan týyndaǵan genetıkalyq geterogendi tuqym qýalaıtyn, ári emdelmeıtin aýrý. Basqasha aıtqanda, adamnyń bulshyq etteri múldem jumys istemeı qalady. Al, Nýsınersen (Spınraza) preparaty osyndaı syrqatqa shaldyqqan balalardyń ómirin edáýir jeńildetedi», -dep habarlady balalar aýrýhanasynyń baspasóz qyzmeti.