Atyraýǵa jyl basynan beri 182 qandasymyz kóship keldi

ATYRAÝ. QazAqparat - Atyraý oblysyna bıylǵy jeti aıda jat jerde urpaq órbitip, ata dástúrin berik ustanǵan 123 otbasy kóship keldi, dep habarlaıdy QazAqparat.

Osylaısha, ata-babasynyń tamyry jaıylǵan atajurtynyń bir ýys topyraǵyn ańsap jetken 182 qandastyń kóńili bir demdeldi.

– Qazaqstan Respýblıkasyna turaqty turý maqsatymen kelgen etnıkalyq qazaqtar qandas mártebesin aldy. Onyń ishinde Ózbekstan Respýblıkasynan 114 otbasy (171 adam), Qytaı Halyq Respýblıkasynan 7 otbasy (9 adam) jáne Reseı Federatsııasynan 2 otbasy (2 adam) bar. Atyraý qalasyna 100 otbasy (147 adam), Jylyoı aýdanyna 20 otbasy (32 adam), al Maqat aýdanyna 3 otbasy (3 adam) qonystanýdy uıǵardy, –dep habarlady oblystyq jumyspen qamtýdy úılestirý jáne áleýmettik baǵdarlamalar basqarmasynyń mamandary.