Atyraýǵa Reseıdegi qandastardan gýmanıtarlyq kómek keldi
Atyraýlyq volonter Nazgúl Nájikenovanyń málim etýinshe, gýmanıtarlyq kómek Astrahan oblysyndaǵy «Joldastyq» qazaq mádenıeti» qoǵamdyq birlestiginiń tóraǵasy Nurlan Qandyqov pen «Qazaq mádenıetin damytý» qorynyń tóraǵasy Edýard Ysqaqovtyń bastamasymen jınalǵan. Kórshi eldegi qandastar Atyraýdaǵy aýrýhanamen baılanys jasap, qajetti medıkamentter tizimin alǵan.
«Búgin Atyraý oblystyq kardıologııalyq ortalyqqa 20 myń medıtsınalyq maska, 500 lıtr jezınfektsııalyq suıyqtyq, 1 myń ınfýzıondyq sıstema, 1 myń medıtsınalyq dáke, 300 qorǵanysh kostıými, túrli medıkamentterdi tapsyrdyq», -dedi volonter Nazgúl Nájikenova.
Onyń aıtýynsha, kórshi eldegi qandastarymyzdyń bastamasyna Astrahan oblysynyń gýbernatory Igor Babýshkın qoldaý bildirgen. Bul ıgilikti iske Astrahandaǵy cheshen qoǵamdastyǵynyń músheleri de atsalysqan.
Eske sala ketelik, budan buryn Atyraýǵa Qytaı men Vetnamnan gýmanıtarlyq kómek kelgen edi.