Atyraýǵa «Eýropa-Azııa» halyqaralyq beıbitshilik sherýine qatysýshylar keldi
«Eýropa-Azııa» halyqaralyq beıbitshilik jáne kelisim sherýiniń atqarýshy dırektory Rýslan Abdýllınniń aıtýynsha, sherý 1 shildede Nur-Sultan qalasynan bastalǵan.
Birlik pen ultaralyq tatýlyqty dáripteıtin sherý Qazaqstannyń birneshe qalasynda bolǵan. Onyń ishinde Qaraǵandy, Almaty, Taraz, Shymkent, Qyzylorda, Aqtóbe, Oral qalalary bar. Sondaı-aq Qyrǵyzstan Respýblıkasynyń astanasy – Bishkek qalasyna barǵan.
«Bul – halyqaralyq sherý. Sol sebepten, memlekettiń qarajatyna emes, halyqtyń qarjylyq qoldaýymen ótip jatyr. Bizdiń maqsat – birlik pen beıbitshilikti dáripteý. Sherýdiń alǵashqy kezeńi aıaqtalǵannan keıin kelesi saparǵa daıyndalamyz. Eýropa men Azııanyń 17 elin aralaýdy kózdep otyrmyz», - deıdi Rýslan Abdýllın.
Onyń aıtýyna qaraǵanda, «Eýropa-Azııa» halyqaralyq beıbitshilik jáne kelisim sherýi shildeniń sońynda Vladıkavkaz (Reseı) qalasynda aıaqtalady. Sharaǵa qatysýshylar Qazaqstan, Qyrǵyzstan, Ózbekstan jáne Bashqurtstan Respýblıkalarynyń azamattarynan quralǵan.
Atyraý Óńirlik kommýnıkatsııalar alańynda ótken baspasóz brıfınginen keıin sherýge qatysýshylar din salasynyń ókilderimen kezdesti. Sondaı-aq olar Sh.Sarıev atyndaǵy kórkem sýret jáne qoldanbaly sándik óner mýzeıindegi halyq shyǵarmashylyǵy kórmesin tamashalady.
Halyqaralyq sharany qoldaýshylar Atyraý qalasynyń ortalyq kóshelerimen Qazaqstannyń kók Týyn kóterip, Sultan Beıbarys alańyna deıin avto-moto sherýmen júrip ótedi. Keıin qala qonaqtary úshin kontserttik baǵdarlama uıymdastyrylady.