Atyraýdyń Reseımen shekaradaǵy aýdanynda 2 eldi meken qurylady
Qurmanǵazy aýdandyq qurylys, sáýlet jáne qala qurylysy bólimi basshysynyń mindetin atqarýshy Renat Nuǵmanovtyń málimetinshe, Qurmanǵazy aýyldyq okrýgindegi «Bolashaq» jáne «Shıpajaı» shaǵyn aýyldary jańa eldi meken retinde qaıta qurylady. Qazir munda ınjenerlik-kommýnıkatsııalyq ınfraqurylymnyń qurylysy aıaqtaldy.
«Josparǵa sáıkes joba 468 jer ýchaskesine arnalǵan. Kezekte turǵan jeke adamdarǵa turǵyn úı qurylysy úshin 1 gektardan jer beriledi. Qazir «Nurly jer» baǵdarlamasymen 468 jer telimine 13,1 shaqyrymdyq aýylishilik joldar, 41,4 shaqyrym elektr jaryǵy, 27,4 shaqyrym aýyz sý, 21,4 shaqyrymyna gaz qubyry tartylyp, ýchaskeler tolyqtaı daıyndaldy. Merdiger mekeme – «Qaraǵandy joldary» JShS. Bul jobanyń quny 1 mıllıard 550 mıllıon 645 myń teńgeni quraıdy», -deıdi Renat Nuǵmanov.
Onyń aıtýynsha, Qurmanǵazy aýyldyq okrýginde 2016 jyldan beri jer alý kezegine eki myńǵa jýyq turǵyn tirkelgen. Qazir zańdylyqqa sáıkes kezektegi turǵyndarǵa jer telimi berile bastady. Búginge deıin 60 turǵyn jer telimin alǵan. Endi kezektegi 120 turǵynǵa jer telimi beriledi.
Eske sala ketelik, buǵan deıin Atyraý oblysynda Reseımen shekaradaǵy aýyldar ataýy ózgergenin habarlaǵan bolatynbyz.