Atyraýdyń Qurmanǵazy aýdanynda 60 páterlik turǵyn úı paıdalanýǵa berildi

ATYRAÝ. QazAqparat – El Táýelsizdiginiń 30 jyldyǵy qarsańynda Atyraý oblysynyń Qurmanǵazy aýdanynda 60 páterlik 3 qabatty turǵyn úı paıdalanýǵa berildi, dep habarlaıdy QazAqparat.

Qurmanǵazy aýdanynyń ákimi Marat Mýrzıevtiń aıtýynsha, buǵan deıin 2 kópqabatty turǵyn úı boı kóterip, baspanaǵa muqtaj otbasylarǵa berilgen. Al, «Dekor» JShS bul turǵyn úıdi Qadyr eldi mekeninde turǵyzǵan.

«Elimizdiń Táýelsizdik alǵannan beri turǵyndardyń áleýmettik máseleleri oń sheshimin taýyp keledi. Sonyń biri – baspanaǵa muqtajdyq. Qazir turǵyndar úshin baspanaly bolýdyń múmkindigi artty. Aýdandarda da «Nurly jer» baǵdarlamasymen turǵyn úı keshenderi salynyp, el ıgiligine berilip jatyr. Kóptegen otbasy qonys toıyn toılap, qýanyshqa keneldi. Memlekettiń myńdaǵan otbasyǵa kórsetken qoldaýynyń nátıjesinde árbir azamat óz baspanasynyń ıesi atandy», -deıdi Marat Mýrzıev.

Ákimniń aıtýynsha, jańa turǵyn úıdiń páterleri 3 sanatqa kiretin turǵyndarǵa bólinedi. Aldymen, kópbalaly otbasylarǵa úsh bólmeli páter beriledi. Sondaı-aq, múmkindigi shekteýli jandarǵa tómengi qabattan baspana berý kózdelgen. Jańa páterlerdiń kilti alǵashqy 15 adamǵa tapsyryldy.

Eske sala ketelik, buǵan deıin Atyraýda Táýelsizdik kúni qarsańynda 200 oryndyq jataqhana ashylǵan bolatyn.