Atyraýdyń keıbir bóliginde 18 tamyzǵa deıin ystyq sý ýaqytsha toqtatyldy
Atyraý oblysynyń energetıkalyq kesheni baspasóz qyzmetiniń málimetinshe, buǵan jylý pýnktteriniń jabdyqtaryn jóndeý sebep bolyp otyr.
«Qala turǵyndaryna «Atyraý jylý jelileri» AQ-nyń jylý pýnktteriniń jabdyqtaryn tekserýge baılanysty jóndeý jumystary júrgiziletinin habarlaımyz. Bul – kásiporynnyń kúrdeli jóndeý josparyna sáıkes atqarylatyn jumys. Sol sebepten, 14-18 tamyz aralyǵynda jekelegen mekenjaılar boıynsha ystyq sý berý ýaqytsha toqtatylady», - dep habarlady energetıkalyq keshenniń baspasóz qyzmeti.
Belgili bolǵandaı, úsh jylý pýnktinde jabdyqtardy jóndeý bastalǵan. Soǵan baılanysty «Ushqyn» ortalyq jylý pýnktinen Azattyq, Qarymsaqov, Stahanovtsev, M.Áýezov, Moldaǵalıev, Sháripov, 8-naýryz kóshelerindegi 30, «Vokzal mańy-5 shaǵyn aýdanyndaǵy №56 jylý pýnktine qaraıtyn 29, M.Baımuhanov kóshesinde ornalasqan 3 turǵyn úıge ystyq sý berý toqtatyldy.
Sondaı-aq «Leshoz» ortalyq jylý pýnktinen «Leshoz» shaǵyn aýdanyndaǵy 38, al Medeýbaev kóshesindegi bir úıdiń turǵyndary ystyq sýsyz otyr.
Al búgin, 15 tamyzda Á.Moldaǵulova kóshesindegi D-355 mm sý qubyrynda avarııalyq-qalpyna keltirý jumystaryn júrgizý qolǵa alyndy. Sol sebepten saǵat 10:00-den 18:00-ge osy mańdaǵy 14 kóshede ornalasqan turǵyn úıler men keńselerge, ózge de nysandarǵa salqyn sý berý toqtatyldy.
Eske sala ketelik, budan buryn Atyraýdyń bir bóliginde taǵy 4 kún ystyq sý bolmaıtynyn jazǵan edik.
Keıin káriz kollektoryndaǵy aqaýdan bir shaǵyn aýdan sýsyz qalǵanyn habarlaǵan bolatynbyz.