Atyraýdyń irgesindegi eldi mekende jabaıy qabandar júr

ATYRAÝ. QazAqparat – Atyraý qalasynyń irgesindegi eldi mekende jabaıy qabandar júr, dep habarlaıdy QazAqparat tilshisi.

Jabaıy qabandar Atyraý qalasyna taıaý ornalasqan Erkinqala-2 eldi mekenine kirip ketken. Aýyldyń turǵyndary Whatsapp messendjerinde kóshede júrgen úsh qabandy vıdeoǵa túsirgen.

Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Nurlan Imanǵalıevtyń aıtýynsha, jabaıy qabandar «Aqjaıyq» memlekettik tabıǵı rezervatynan kelýi múmkin.

«Erkinqala aýyl okrýginiń janynda «Aqjaıyq» memlekettik tabıǵı rezervaty ornalasqan. Janýarlar sol rezervattan Jaıyq ózeni arqyly júzip shyqqan bolýy múmkin dep oılaımyz. Osy oqıǵadan keıin jergilikti okrýg ákimimen birge aýyldy aralap shyqtyq. Janýarlar aýylǵa kirip, keri qashyp ketken. Aýylda eshqandaı tosyn oqıǵa tirkelmedi. Turǵyndar arasynda zardap shekkender joq. Jalpy, qabandar – qaýipti janýarlar. Biraq, qabandar adamdardan qorqady», -deıdi Nurlan Imanǵalıev.

Onyń aıtýyna qaraǵanda, bul aýylda 1980 jyldary jabaıy qabannyń, ne ózge de ańdardyń kirgeni jıi baıqalǵan. Alaıda, odan keıin mundaı oqıǵa tirkelmegen.

«Aýylǵa jabaıy janýarlar, ne ańdar kirgen kezde óte saq bolý qajet. Sebebi, adamdarǵa, ásirese, balalarǵa qaýip tóndirýi múmkin», -deıdi Nurlan Imanǵalıev.

Áleýmettik jelide aýylǵa kirgen qabandardyń atylǵany týraly sýretter tarady.

Alaıda, bul derekti aýmaqtyq ınspektsııanyń bas mamany Nurlan Imanǵalıev joqqa shyǵardy.

Eske sala ketelik, budan buryn Atyraýda eki jarqanat páterge kirip ketkenin habarlaǵan edik.