Atyraýdyń balyq ónimderi shet elderge tanyla bastady - Mahambet Dosmuhambetov

NUR-SULTAN. QazAqparat - «Atyraýda jasalǵan» brendimen shyǵarylatyn balyq ónimderi shet elderge tanyla bastady. Bul týraly búgin Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes, balyq sharýashylyǵy salasyna úlken qoldaý kórsetilýde. Qazir oblysta 18 óndiristik kásiporyn balyq aýlaýmen jáne ony óńdeýmen aınalysady. 10 aıda 7 300 tonna balyq aýlanyp, ótken jyldyń sáıkes kezeńmen salystyrǵanda 11,5 paıyzǵa ósim kórsetti», - dedi óńir basshysy Ortalyq kommýnıkatsııalar qyzmetindegi baspasóz máslıhatynda.

Mahambet Dosmuhambetovtiń dereginshe, aýlanǵan balyqtyń 81 paıyzy shetelderge eksportqa shyǵarylǵan.

«Atyraýda jasalǵan» brendimen shyǵarylatyn balyq ónimderi shetelderge tanyla bastady. Bekire balyqtary ósimin qamtamasyz etý maqsatynda Atyraý qalasyndaǵy 2 bekire zaýyty jylyna teńizge 7,5 mln shabaq jiberip otyr, - dedi Atyraý oblysynyń ákimi.