Atyraýdyń 7 aýdany men Teńiz kenishinde koronavırýsqa shaldyqqandar anyqtaldy
Oblystyq densaýlyq saqtaý basqarmasynyń baspasóz qyzmetinen málim etkendeı, koronavırýs ınfektsııasyn juqtyrǵandar barlyq aýdan men Teńiz kenishinde anyqtalyp otyr.
«Óńirdegi ınfektsııalyq statsıonarlarda emdelip jatqan naýqastardyń sany 485 adamǵa jetti. Onyń ishinde modýldik aýrýhanada – 185, №2 oblystyq aýrýhanada – 135, aýdandardaǵy statsıonarlarda – 112, Teńiz ken ornyndaǵy statsıonarda 53 adam emdelip jatyr. Al, úı jaǵdaıynda emdelýge oqshaýlanǵan naýqastar sany – 420 adam» dep habarlady basqarmanyń baspasóz qyzmeti.
Sońǵy kúnderi óńirde qaýipti vırýsty juqtyrýshylar sany kóbeıip barady.
Máselen, ótken táýlikte 137 adamnan koronavırýs ınfektsııasy tabylǵan. Onyń ishinde 92 naýqas Atyraý qalasynda tirkelgen.
Sondaı-aq, Qurmanǵazy aýdanynda 9, Inderde 8, Jylyoıda – 7, Isataıda – 7, Mahambette – 5, Maqatta – 3, Qyzylqoǵa aýdanynda 2 adamnan vırýs belgisi anyqtalǵan.
Al, Teńiz kenishinde 4 jumysshy qaýipti indetke shaldyqqan.
Eske sala ketelik, budan buryn Atyraý oblysynda 18 adam úndi shtamyn juqtyryp alǵanyn jazǵan edik.